وزیراعلیٰ خیبر پختونخوا سہیل آفریدی کا کہنا ہے کہ کچھ جماعتوں نے اقتدار کی خاطرجمہوریت کو نقصان پہنچایا، اسٹریٹ موومنٹ شروع، آئین وقانون میں رہ کرجدوجہد کریں گے۔
تقریب سے خطاب میں سہیل آفریدی نے کہا کہ آئین ہمیں پُرامن احتجاج کا حق دیتا ہے ۔ ہم یہ حق ہر صورت استعمال کریں گے ۔ سازشی عناصر نوجوانوں کو اشتعال دلانے کی کوشش کریں گے ۔ نوجوان ملک دشمن بیانیے اور منفی پروپیگنڈے سے ہوشیار رہیں۔
وزیراعلیٰ خیبر پختونخوا نے کہا کہ ہم نے ہمیشہ آئین اور قانون کے دائرے میں رہ کر جدوجہد کی ہے، یہی ہماری پہچان ہے، غلط سیاسی کلچر اور انتشار کی سیاست انہی کرپٹ عناصر نے متعارف کروائی، حقیقی آزادی کی جدوجہد آئین اور قانون کے دائرے میں رہ کر جاری رہے گی۔ بانی کی اگلی کال تک ہر سطح پر مکمل تیاری ہمارا ہدف ہے۔
