بلوچستان کے ضلع چاغی میں آئل ٹینکر اور مسافر گاڑی کے درمیان خوفناک تصادم کے نتیجے میں 10 افراد جاں بحق جبکہ 6زخمی ہو گئے۔
پولیس ذرائع کے مطابق حادثہ تحصیل نوکنڈی کے قریب ریکوڈک سائٹ روڈ پر پیش آیا، جہاں آئل ٹینکر اور گاڑی آپس میں ٹکرا گئے۔ حادثے میں گاڑی کے ڈرائیور سمیت کئی افراد موقع پر ہی جان کی بازی ہار گئے۔
پولیس کا کہنا ہے کہ گاڑی کے ڈرائیور کی شناخت خدائے نظر کے نام سے ہوئی ہے، جو تفتان کا رہائشی بتایا جاتا ہے۔ جاں بحق ہونے والے دیگر افراد کے بارے میں پولیس ذرائع کا کہنا ہے کہ ان کا تعلق افغانستان سے ہو سکتا ہے، جو غیر قانونی طور پر پاکستان کے راستے ایران جانا چاہتے تھے۔
حادثے کے بعد زخمیوں اور جاں بحق افراد کی لاشوں کو نوکنڈی اسپتال منتقل کر دیا گیا، جہاں تین زخمیوں کی حالت تشویشناک بتائی جا رہی ہے۔ پولیس نے واقعے کی تحقیقات شروع کر دی ہیں۔
