انسداد دہشت گردی عدالت نے 9 مئی جلاؤ گھیراؤ کے ایک اور مقدمے میں یاسمین راشد سمیت پی ٹی آئی کے دیگر سینئر رہنماؤں کو 10،10 سال قید کی سزا سنادی جبکہ شاہ محمود قریشی سمیت 13 ملزمان کو بری کردیا۔
نو مئی جلاؤ گھیراؤ کے ایک اور مقدمے کا فیصلہ سنا دیا گیا، اے ٹی سی کے جج منظر علی گل نے کوٹ لکھپت جیل میں کیس کا فیصلہ سنایا۔
ڈاکٹر یاسمین راشد، میاں محمود الرشید، اعجاز چوہدری اور عمر سرفراز چیمہ کو 10،10 سال قید کی سزا سنادی گئی جبکہ شاہ محمود قریشی کو جی او آر گیٹ توڑنے کے مقدمے سے بری کردیا۔ عبد اللہ بدر، مشتاق احمد ، قاسم الہی ، محمد شہباز کو بھی 10،10 سال قید کی سزا سنائی۔
دوران ٹرائل ڈاکٹر یاسمین راشد سمیت 21 ملزمان کے حتمی بیانات قلمبند کیے گئے، پراسیکیوشن کی جانب سے 56 گواہوں کو عدالت میں پیش کیا گیا۔ دوران ٹرائل چار ملزمان کو اشتہاری قرار دیا گیا تھا، تھانہ ریس کورس پولیس نے مقدمے کا چالان پیش کر رکھا تھا۔
