آسٹریلیا اور انگلینڈ کے درمیان جاری ایشز سیریز کے تیسرے ٹیسٹ میچ میں میزبان ٹیم نے اپنی گرفت مضبوط کر لی۔
جمعے کو ایڈیلیڈ اوول میں ٹیسٹ کے تیسرے روز آسٹریلیا نے ٹریوس ہیڈ کی شاندار اور ناقابل شکست سنچری کی بدولت اپنی دوسری اننگز میں 4 وکٹوں کے نقصان پر 271 رنز بنا لیے جس کے ساتھ ہی اسے انگلینڈ پر 356 رنز کی مجموعی برتری حاصل ہو گئی۔
ٹریوس ہیڈ نے جارحانہ بیٹنگ کا مظاہرہ کرتے ہوئے 142 رنز ناٹ آؤٹ سکور کیے جبکہ ایلیکس کیری 52 رنز پر ان کا بھرپور ساتھ دے رہے ہیں۔ دونوں کے درمیان چوتھی وکٹ میں 122 رنز کی شراکت قائم ہو چکی ہے۔
عثمان خواجہ 40، مارنس لابوشین 13، کیمرون گرین 7 اور جیک ویترالڈ ایک رن بنا کر آؤٹ ہوئے۔ انگلینڈ کی جانب سے جوش ٹنگ نے دو جبکہ برینڈن کارس اور ول جیک نے ایک ایک وکٹ حاصل کی۔ واضح رہے کہ اس سے قبل انگلینڈ کی ٹیم اپنی پہلی اننگز میں 286 رنز بنا کر آؤٹ ہو گئی تھی جس کے باعث اسے 85 رنز خسارے کا سامنا کرنا پڑا۔
انگلش کپتان بین سٹوکس نے 83 رنز کی مزاحمتی اننگز کھیلی جبکہ جوفرا آرچر نے 51 رنز بنائے۔ آسٹریلیا کی طرف سے پیٹ کمنز اور سکاٹ بولانڈ نے تین تین جبکہ نیتھن لائن نے دو کھلاڑیوں کو آؤٹ کیا۔
