وفاقی وزیرِ ریلوے حنیف عباسی سے ایشیائی ترقیاتی بینک کی ڈائریکٹر جنرل لیہ گوتیرز نے اپنی ٹیم کے ہمراہ ملاقات کی۔ جس میں ریلوے کے اسٹریٹجک اہمیت کے حامل منصوبے "مین لائن ون" کی اپ گریڈیشن مستقبل کے لائحہ عمل پر تفصیلی تبادلہ خیال کیا گیا۔
ملاقات کے دوران وفاقی وزیر کو دی گئی بریفنگ میں بتایا گیا کہ ایم ایل ون منصوبہ پاکستان ریلوے کی معاشی و جغرافیائی شہ رگ ہے، جو ملک کی 80 فیصد مسافر ٹریفک اور 90 فیصد فریٹ (مال برداری) کی نقل و حمل کا بوجھ سنبھالے ہوئے ہے۔
وفاقی وزیر نے اس بات پر زور دیا کہ انفراسٹرکچر کی موجودہ حالت اور بڑھتی ہوئی طلب کے پیش نظر اس ٹریک کی فوری اپ گریڈیشن وقت کی اہم ضرورت ہے۔وفاقی وزیرِ ریلوے محمد حنیف عباسی نے گفتگو کرتے ہوئے کہا کہ ایم ایل ون محض ایک ریلوے ٹریک نہیں بلکہ قومی معیشت کی بحالی کے لیے ایک کلیدی منصوبہ ہے۔ انہوں نے اس میگا پراجیکٹ کو حکومت کی اولین ترجیحات میں شامل قرار دیا۔
ایشیائی ترقیاتی بینک کی ڈائریکٹر جنرل نے منصوبے کی تیاری اور اب تک کی پیش رفت پر مکمل اعتماد کا اظہار کرتے ہوئے تکنیکی اور مالیاتی تعاون جاری رکھنے کے عزم کا اعادہ کیا۔ ملاقات کے دوران یہ اہم پیش رفت سامنے آئی کہ دونوں فریقین نے اتفاق کیا کہ ایم ایل ون کراچی تا روہڑی سیکشن کی اپ گریڈیشن کا باقاعدہ آغاز (گراؤنڈ بریکنگ) جولائی 2026 میں کر دیا جائے گا۔اس ملاقات سے پاکستان ریلوے کی جدید خطوط پر استواری اور ملکی معیشت میں استحکام کی نئی راہوں کے کھلنے کی امید ظاہر کی گئی ہے۔
