آسٹریلیا کے شہر سڈنی کے ساحل پر ہوئے حملے کی تحقیقات میں اہم پیشرفت ہوگئی ہے۔ فلپائنی حکام نے حملہ آوروں کے دورے کی تصدیق کردی۔
امریکی جریدے بلومبرگ کی رپورٹ کے مطابق فلپائنی امیگریشن حکام کا کہناہے کہ حملہ آور ساجد اکرم اور نوید اکرم یکم نومبر 2025 کو فلپائن پہنچے۔ دونوں باپ بیٹے نے سڈنی سے فلپائن کا سفر کیا تھا۔ دونوں ملزمان نے داواؤ شہر میں قیام کیا۔ باپ بیٹا 28 نومبر 2025 کو منیلا سے سڈنی واپس روانہ ہوگئے۔
رپورٹ کے مطابق حملہ آور باپ بیٹے نے بھارتی پاسپورٹ پر فلپائن کا سفر کیا تھا۔ سڈنی میں حملہ داعش سے متاثر ہوکر کیا گیا۔ بھارتی وزارت خارجہ نے اس حوالے سے سوال کا جواب نہیں دیا۔
آسٹریلوی حکام نے مزید تحقیقات کیلئے مودی سرکار سے معاونت طلب کرلی۔ آسٹریلین فیڈرل پولیس کی تحقیقات کے مطابق حملہ داعش سے متاثر ہوکر کیا گیا، ملزمان کی گاڑی سے داعش کا پرچم بھی ملا۔ پولیس کمشنرنے کہا کہ وہ صرف دہشت گرد تھے، کسی مذہب کی نمائندگی نہیں کر رہے تھے۔
واضح رہے کہ دو روز قبل آسٹریلیا کے شہر سڈنی کے ساحل پر مسلح افراد نے شہریوں پر فائرنگ کردی جس کے نتیجے میں 16 افراد ہلاک اور40 زخمی ہوگئے تاہم پولیس کی جوابی کارروائی میں فائرنگ کرنے والا ایک شخص مارا گیا اور دوسرے حملہ آور کو زخمی حالت میں حراست میں لے لیا گیا۔
نیو ساؤتھ ویلز پولیس نے واقعے سے متعلق پریس کانفرنس کرتے ہوئے بتایاکہ ساحل پر یہودیوں کی تقریب کے دوران فائرنگ کرنے والے دونوں حملہ آور باپ بیٹا تھے جن میں سے ایک ہلاک ہوگیا جب کہ دوسرا حملہ آور شدید زخمی حالت میں ہے۔
