پنجاب بھر میں ٹریفک قوانین پر سختی سے عملدرآمد کروایا جارہاہے اور شہریوں نے بھاری چالان سے بچنے کیلئے لائسنس بنوانے کیلئے دفاتر کا رخ کر لیاہے جس پر معروف گلوکار ’وارث بیگ ‘ نے پنجاب حکومت کی کاوشوں کی تعریف کرتے ہوئے اسے درست اقدام قرار دیا ہے۔
تفصیلات کے مطابق پاکستان کے ہر دلعزیز گلوکار وارث بیگ کا پیغام سوشل میڈیا پر صارفین کی توجہ کا مرکز بنا ہواہے ، اپنے پیغام میں ان کا کہناتھا کہ "میں بہت خوش ہوں کہ صرف 10 دن میں 15 لاکھ ڈرائیونگ لائسنس بنے ہیں، حادثات کم ہو رہے ہیں، لوگ لائنوں میں کھڑے ہو کر لائسنس بنوا رہے ہیں۔"
انہوں نے وزیراعلیٰ پنجاب مریم نواز کا خصوصی شکریہ ادا کیا اور کہا کہ عوام کے لیے بہترین اقدام کیا گیا ہے، جبکہ اس کا کریڈٹ پنجاب پولیس اور ٹریفک پولیس کو بھی جاتا ہے۔
وارث بیگ نے بتایا کہ ان کا اپنا چالان بھی ہوا جسے انہوں نے خوشی سے ادا کیا، اور شہریوں کو پیغام دیا کہ قانون کی پابندی کریں، لین کی خلاف ورزی اور غلط اوور ٹیکنگ سے گریز کریں، کیونکہ حادثات انہی غلطیوں کی وجہ سے ہوتے ہیں۔
View this post on Instagram
واضح رہے کہ پنجاب بھر میں ٹریفک قوانین پر سختی سے عملدرآمد کروانے کے لیے جاری خصوصی مہم کے مثبت نتائج سامنے آنے لگے۔ شہری بڑی تعداد میں ڈرائیونگ لائسنس بنوانے کے لیے لائسنسنگ سنٹرز کا رخ کر رہے ہیں، جبکہ کم عمر ڈرائیونگ، لائسنس نہ رکھنے، سیٹ بیلٹ نہ باندھنے اور ون وے کی خلاف ورزی پر بھاری جرمانوں اور قانونی کارروائیوں کا سلسلہ جاری ہے۔
