ایران میں سونے کا بڑا ذخیرہ دریافت ہو گیا ہے۔
مقامی میڈیا کے مطابق ایران نے ملک کی سب سے بڑی کانوں میں سے ایک میں سونے کا ایک بڑا ذخیرہ دریافت کرنے کا اعلان کیا ہے۔
سونے کی کان ’شادان‘ جنوبی خراسان میں واقع ہے جو ملک کی اہم ترین کانوں میں سے ایک ہے، ایران کی وزارتِ صنعت، معدن و تجارت نے نئے ذخائر کی باضابطہ توثیق کر دی ہے۔
یہ ذخیرہ رگوں کی شکل میں دکھائی دیتا ہے، جیسے ایک وسیع طلائی رگ ہو، اس طلائی ذخیرے میں تقریباً 7.95 ملین ٹن آکسائیڈ اور 53.1 ملین ٹن سلفائیڈ سونا موجود ہے۔
واضح رہے کہ ایران میں سونے کی 15 کانیں ہیں جن میں سب سے بڑی کان ملک کے شمال مغرب میں واقع زرشوران ہے۔ سونا عام طور پر ایرانیوں کے لیے بھی ایک محفوظ سرمایہ کاری یا اثاثہ ہے کیوں کہ بڑھتی ہوئی مہنگائی اور ڈالر کے مقابلے میں ایرانی ریال کے دائمی انحطاط کی وجہ سے ان کی قوتِ خرید کم ہوتی جا رہی ہے۔
