وفاقی وزیر داخلہ اور چیئرمین پی سی بی محسن نقوی نے سعودی وزیر کھیل سے ملاقات میں کرکٹ سمیت دیگر کھیلوں کے فروغ اور مشترکہ پروگرامز اور میزبانیوں کے حوالے سے پیشرفت پر اتفاق ہوا۔
وفاقی وزیرداخلہ و چیئرمین پاکستان کرکٹ بورڈ محسن نقوی نے سعودی عرب کا دورہ کیا۔ دورے کے دوران محسن نقوی نے سعودی وزیرِ کھیل شہزادہ عبدالعزیز بن ترکی الفیصل سے ملاقات کی، جس میں سعودی عرب میں کرکٹ کے فروغ اور اسپورٹس کے مختلف شعبوں میں دوطرفہ تعاون مزید مستحکم بنانے پر تبادلہ خیال کیا گیا۔
محسن نقوی نے کہا کہ شہزادہ عبدالعزیز بن ترکی الفیصل وژن 2030 کے تحت کھیلوں کو غیر معمولی انداز میں آگے بڑھا رہے ہیں، جبکہ سعودی قیادت کی سرپرستی میں مملکت نے عالمی ٹورنامنٹس کی میزبانی حاصل کرکے نئی تاریخ رقم کی ہے۔
محسن نقوی نے فیفا ورلڈ کپ 2034 کی میزبانی کے حصول پر سعودی وزیرِ کھیل کو مبارکباد بھی دی، اور کہا کہ پاکستان اور سعودی عرب کھیلوں خصوصاً کرکٹ کو دوستی اور علاقائی ہم آہنگی کا مضبوط پل بنائیں گے۔ ملاقات میں اس بات پر بھی اتفاق ہوا کہ دونوں ممالک کے متعلقہ ادارے رابطوں کو مزید تیز کریں گے۔
محسن نقوی کا کہنا تھا کہ سعودی عرب میں کرکٹ انفراسٹرکچر کی ترقی، مشترکہ ٹریننگ پروگرامز، باہمی دوروں اور جونیئر و یوتھ لیول ٹورنامنٹس کے ذریعے دونوں ممالک کے نوجوانوں کے لیے نئے مواقع پیدا کیے جا سکتے ہیں۔
