وزیراعلیٰ خیبر پختونخوا سہیل آفریدی کا کہنا ہے کہ ملک کو نقصان پہنچانے والی پالیسیز پر ہمیشہ کی طرح تنقید جاری رہے گی ۔ ہم حق اور سچ کی بات کرتے ہیں کسی کو تلخ لگتا ہے تو لگتا رہے۔ وفاق نے ہمیں 3 ہزار ارب روپے سے زیادہ دینے ہیں وہ دیں تاکہ صوبہ ترقی کرے۔
اسلام آباد میں الیکشن کمیشن کے باہر میڈیا سے گفتگو میں سہیل آفریدی نے کہا کہ ہری پور ضمنی الیکشن کے دوران فارم 45 اور آر او کی طرف سے جاری نتائج میں فرق ہے۔ اس کے خلاف قانونی جنگ لڑیں گے۔ الیکشن کمیشن ہو یا کوئی اور ادارہ سب ہمارے لیے قابل احترام ہیں۔
سہیل آفریدی نے کہا کہ حویلیاں جلسے میں ان کی تقریر آئین و قانون کے دائرے کے اندر تھی ۔ بس اتنا کہا تھا کہ الیکشن میں دھاندلی کرنے والوں کے خلاف کارروائی ہوگی۔ اس میں بھلا غلط کیا ہے کہ الیکشن کمیشن نے نوٹس جاری کر دیا ؟ میرے خیال میں یہ کوئی غلط بات نہیں ہے۔
وزیراعلیٰ خیبرپختونخوا نے کہا کہ ہم بھی چاہتے ہیں ترقی کریں، وفاق ہمارے ساتھ امتیازی سلوک نہ کرے، کل کے احتجاج سے متعلق سلمان اکرم راجا اعلان کریں گے۔ ہماری تحریک پہلے بھی چل رہی ہے اور یہ آگے بھی چلے گی، 26 نومبر کے احتجاج سے متعلق پارٹی جو فیصلہ کرے گی عمل ہوگا۔
