وفاقی وزیر مواصلات عبدالعلیم خان نے کرم میں بھارتی حمایت یافتہ فتنہ الخوارج کی کارروائی کی شدید مذمت کی۔انہوں نے ملک دشمن عناصر کے خلاف آپریشن میں پاک فوج کے شہداء کو خراج عقیدت پیش کیا۔ کہا دفاع وطن اور امن کے لیے جانوں کا نذرانہ ہمیشہ یاد رکھا جائے گا۔
سماجی رابطے کی ویب سائیٹ ایکس پر اپنے پیغام میں عبدالعلیم خان نے کہا کہ کیپٹن نعمان سلیم اور پانچ بہادر جوانوں کی عظیم قربانیوں کو خراج عقیدت پیش کرتے ہیں۔شہداء کی قربانیاں کبھی فراموش نہیں کی جائیں گی۔ اللہ تعالی شہداء کو جنت الفردوس میں اعلی مقام عطا فرمائے۔
واضح رہے کہ گزشتہ روز سیکیورٹی فورسز نے خفیہ اطلاعات پر کرُم کے علاقے دوگر میں آپریشن کے دوران 7 خوارجیوں کو ہلاک کر دیا تھا، آپریشن میں پاک فوج کے کیپٹن سمیت 6 جوان شہید ہو گئے۔ آئی ایس پی آر کے مطابق سیکیورٹی فورسز کی جانب سے یہ آپریشن بھارت کے حمایت یافتہ دہشتگرد گروہ ’ فتنتہ الخوارج‘ کے دہشتگردوں کی اطلاع پر کی گئی ، کارروائی کے دوران 7 دہشتگردوں کو جہنم واصل کیا گیا۔
