وزیراعظم شہباز شریف اعلیٰ سطح وفد کے ساتھ سعودی عرب روانہ ہو گئے۔ ریاض میں فیوچر انویسٹمنٹ انیشی ایٹیو کی نویں کانفرنس میں شرکت کے ساتھ عالمی رہنماؤں اور اداروں کے سربراہان سے ملاقاتیں بھی کریں گے۔
وزیراعظم کو دورے کی دعوت سعودی ولی عہد محمد بن سلمان نے دی تھی۔ نائب وزیراعظم اسحاق ڈار، وزیر خزانہ محمد اورنگزیب، وزیراطلاعات عطا تارڑ ، معاونین خصوصی طارق فاطمی اور بلال بن ثاقب بھی وفد کا حصہ ہیں۔ وزیراعظم شہباز شریف فیوچر انویسٹمنٹ انیشی ایٹیو کی نویں کانفرنس میں پاکستان کی نمائندگی کریں گے۔
وزیراعظم کی سعودی قیادت سے ملاقاتیں بھی ہوں گی۔ ملاقاتوں میں تجارت، سرمایہ کاری، توانائی اور افرادی قوت کے شعبوں میں تعاون پر تبادلہ خیال ہوگا۔ باہمی دلچسپی کے عالمی و علاقائی امور پر بھی گفتگو ہوگی۔
وزیراعظم شہباز شریف کانفرنس میں شریک عالمی رہنماؤں اور عالمی اداروں کے سربراہان سے بھی ملیں گے۔ ملاقاتوں میں پاکستان میں سرمایہ کاری اور پائیدار ترقی کے حوالے سے تعاون کی استعداد پر گفتگو ہوگی۔
