پاکستان اور بنگلہ دیش کا دفاعی اور سیکیورٹی تعاون مزید مضبوط بنانے پر اتفاق کیا گیا۔
آئی ایس پی آر کے مطابق چیئرمین جوائنٹ چیفس آفس اسٹاف کمیٹی نے بنگلادیش کا سرکاری دورہ کیا۔ جنرل ساحر شمشاد نے چیف ایڈوائزر محمد یونس اور عسکری قیادت سے ملاقاتیں کیں ۔ دونوں ممالک کے درمیان دفاعی اور سیکیورٹی تعاون مزید مضبوط بنانے پر اتفاق کیا گیا، عالمی اور علاقائی سیکیورٹی صورتحال پر بھی تفصیلی گفتگو کی گئی ۔
آئی ایس پی آر کے مطابق جنرل ساحر شمشاد مرزا نے بنگلادیشی بحریہ و فضائیہ کے سربراہان اور پرنسپل اسٹاف آفیسر آرمڈ فورسز ڈویژن سے ملاقاتیں کیں ۔ انہوں نے پاک بنگلادیش دیرینہ برادرانہ تعلقات کو سراہا ۔ دوطرفہ تعلقات کو خودمختاری ، مساوات اور باہمی احترام کی بنیاد پر مزید فروغ دینے کے عزم کا اظہار کیا ۔ دفاعی اور سیکیورٹی تعاون ، فوجی روابط اور مشترکہ اقدامات بڑھانے کا عزم دہرایا ۔
جنرل ساحر شمشاد مرزا نے سلہٹ میں اسکول آف انفنٹری اینڈ ٹیکٹکس کا بھی دورہ کیا۔ وہ فیکلٹی ممبران اور طلبہ سے بھی ملے ۔ بنگلادیش کی عسکری و سول قیادت نے پاک فوج کے پیشہ ورانہ معیار کو سراہا ۔ دہشت گردی کے خلاف جنگ میں نمایاں کارناموں اور قربانیوں کی بھی تعریف کی ۔ سناکونجو پہنچنے پر چیئرمین جوائنٹ چیفس آفس اسٹاف کمیٹی کو چاق و چوبند دستے نے گارڈ آف آنر پیش کیا ۔ جنرل ساحر شمشاد مرزا نے شکھا انربان پر پھولوں کی چادر بھی چڑھائی۔
