صدر مملکت نے آزاد کشمیر میں حکومت سازی کے لیے وزیر اعظم سے ٹیلی فون پر رابطہ کیا ہے۔ آصف علی زرداری نے شہباز شریف کو آزاد کشمیر میں حکومت بنانے کے فیصلے پر اعتماد میں لیا۔
ذرائع کے مطابق شہباز شریف نے مسلم لیگ آزاد کشمیر امور کمیٹی کو پیپلز پارٹی سے مذاکرات کا ٹاسک دے دیا ۔ کمیٹی کے سربراہ احسن اقبال کو مقرر کیا گیا۔ دیگر ممبران میں رانا ثنا اور امیر مقام شامل ہیں۔ پیپلز پارٹی کے ساتھ مذاکرات سے قبل کمیٹی نے مسلم لیگ آزاد کشمیر سے مشاورت شروع کردی ہے۔
قبل ازیں ایوان صدر میں صدر مملکت آصف علی ذرداری کی زیرصدارت پیپلزپارٹی آزاد کشمیر کے پارلیمانی گروپ کا اجلاس ہوا جس دوران صدر مملکت نے وزیراعظم آزاد کشمیر چوہدری انوار الحق کے خلاف تحریک عدم اعتماد لانے کی منظوری دے دی۔
پیپلز پارٹی ذرائع کا دعویٰ ہے کہ چوہدری انوار الحق کے خلاف عدم اعتماد لانے کیلئے نمبر پوری ہوگئی ہے، نئے وزیر اعظم آزاد کشمیر کیلئے چوہدری یاسین، چوہدری یعقوب اور چوہدری لطیف اکبر کے نام زیرغور ہیں۔
سیکرٹری اطلاعات پیپلز پارٹی آزاد کشمیر سردار جاوید ایوب نے میڈیا سے گفتگو کرتے ہوئے کہا کہ پی پی پی آزاد کشمیر میں حکومت بنانے جارہی ہے ۔ سردار تنویر الیاس نے کہا کہ ن لیگ وفاق میں ہے تو آزاد کشمیر میں کابینہ میں شمولیت پر اعتراض نہیں ہونا چاہئے۔
دوسری طرف وزیراعظم آزاد کشمیر نے موجودہ صورتحال پر قریبی ساتھیوں سے مشاورت شروع کردی۔ استعفیٰ دینے یا تحریک عدم اعتماد کا سامنا کرنے کیلئے حتمی فیصلہ دو سے تین روز میں متوقع ہے۔
