وزیراعظم شہباز شریف نے جنوبی افریقا اورپاکستان کرکٹ ٹیم کے اعزاز میں عشائیے کا اہتمام کیا اور گفتگو کرتے ہوئے کہا کہ جنوبی افریقا کی کرکٹ ٹیم کو پاکستان میں خوش آمدید کہتے ہیں ، جنوبی افریقا کیساتھ مختلف سطح پر شاندار تعلقات ہیں ،کرکٹ بھی ان میں سے ایک ہے۔
وزیراعظم نے پاکستان اور جنوبی افریقہ کے تمام کھلاڑیوں سے ملاقات بھی کی ، انہوں نے کہا کہ پاک جنوبی افریقا سیریز کھیلوں کے گہرے تعلقات اور باہمی احترام کی علامت ہے، جنوبی افریقا نے کرکٹ کے عظیم کھلاڑی پیدا کئے ہیں، پاکستان کے کرکٹرز نے بھی اپنے عمدہ کھیل سے ملک و قوم کا نام دنیا بھر میں روشن کیا ، امید ہے پاکستان کرکٹ ٹیم ماضی کی طرح شاندار کھیل پیش کرے گی ۔
وزیراعظم شہباز شریف نے کہا کہ چیئرمین پاکستان کرکٹ بورڈ محسن نقوی کی صلاحیتوں پر بھرپور اعتماد ہے، کرکٹ محض ایک کھیل نہیں بلکہ مختلف ممالک کے عوام کو آپس میں جوڑنے کا سبب بھی ہے ، کرکٹ کا کھیل بھائی چارے اور امن کو فروغ دیتا ہے، اس کھیل کی اصل روح کو برقرار رکھنے کی ضرورت ہے ۔
