وزیراعظم شہبازشریف کا کہنا ہے کہ ٹرانس افغان ریلوے اور اسلام آباد، تہران، استنبول ریلوے کوریڈور پر کام کررہے ہیں۔ علاقائی روابط میں اضافے سے معاشی اور تجارتی شعبے میں انقلاب آئےگا۔
ریجنل ٹرانسپورٹ منسٹرز کانفرنس کی اختتامی نشست سے خطاب میں وزیراعظم شہبازشریف نے کہا کہ حکومت اور عوام کی طرف سے شریک مندوبین کو خوش آمدید کہتا ہوں، عالمی سطح پرٹرانسپورٹ اور روابط کے نظام میں تبدیلیاں رونما ہورہی ہیں۔ ریجنل ٹرانسپورٹ منسٹرز کانفرنس نے بات چیت کا اہم موقع فراہم کیا۔ کانفرنس دوطرفہ اور علاقائی روابط کے فروغ کیلئے اہم ہے۔
وزیراعظم کا کہنا تھا کہ ٹرانس افغان ریلوے، اسلام آباد، تہران، استنبول ریلوے کوریڈور پر کام کررہے ہیں، کاروباری روابط، سرمایہ کاری اور مشترکہ خوشحالی پر توجہ مرکوز ہے، پاکستان اقتصادی راہداری منصوبے کے دوسرے مرحلے میں داخل ہورہا ہے۔ علاقائی روابط میں اضافے سے معاشی اور تجارتی شعبے میں انقلاب آئے گا۔
شہبازشریف نے کہا کہ تجارت اورمعیشت میں تعاون سب کے مفاد میں ہے، نوجوان نسل کو جدید دور کے تقاضوں کے مطابق تربیت کی فراہمی ترجیح ہے، پاکستان ڈیجیٹل انفرا اسٹرکچر کے شعبے میں سرمایہ کاری کررہا ہے۔ ان کا مزید کہنا تھا کہ آج کا دور ڈیٹا اور تکنیکی انضمام سے وابستہ ہے، ڈیجیٹل دور میں روابط صرف سڑک، ریل یا فضائی راستوں تک محدود نہیں۔
وزیراعظم شہبازشریف نے کہا کہ گوادر کی طویل ساحلی پٹی اور کراچی بندرگاہ میری ٹائم سلک روڈ میں شامل ہیں، معیشت کی بڑھتی اہمیت نے اس قدیم گزرگاہ کی اہمیت میں اضافہ کردیا، ہمارا خطہ موجودہ بیلٹ اینڈ روڈاینی شیٹو تک روابط کا محوررہا ہے، یقین ہے بڑے منصوبے خطے کی اقتصادی صلاحیتوں کو یکجا کریںگے۔
