عدالت نے وارنٹ گرفتاری کے باوجود عدم پیشی پر علیمہ خان کا شناختی کارڈ اور پاسپورٹ بلاک اور بینک اکاؤنٹس منجمد کرنے کا حکم دیدیا۔
راولپنڈی کی انسدادِ دہشت گردی عدالت میں 26 نومبر کے احتجاج پر علیمہ خان کے خلاف تھانہ صادق آباد میں درج مقدمے کی سماعت ہوئی۔ علیمہ خان عدالت سے جاری وارنٹ گرفتاری کی تعمیل کے باوجود پیش نہ ہوئیں۔
عدالت نے علیمہ خان کا شناختی کارڈ اور پاسپورٹ بلاک کرنے کا حکم دیا گیا۔ گورنر اسٹیٹ بینک کو بھی ہدایت کی کہ علیمہ خان کے تمام بینک اکاؤنٹس منجمد کیے جائیں۔ عدالت نے علیمہ خان کے ضامن کی پراپرٹی بحقِ سرکار قرق کرنے کا حکم دے دیا۔
جج امجد علی شاہ نے ریمارکس دیے کہ ملزمہ ہر جگہ موجود ہوتی ہیں مگر عدالت میں پیش نہیں ہوتیں۔ ان کی حاضری ہر صورت یقینی بنائی جائے۔ عدالت نے کیس کی مزید سماعت پیر 27اکتوبر تک ملتوی کر دی۔
