سپریم جوڈیشل کونسل نے ایک مرتبہ پھر جج صاحبان کو میڈیا پر بیان جاری کرنے سے روک دیا۔
سپریم جوڈیشل کونسل کے اجلاس کے دوران رول نمبر 5 میں دوبارہ ترمیم کرتے ہوئے ججز کو پابند کر دیا گیا جس کے مطابق اب جج صاحبان میڈیا سے بات نہیں کر سکیں گے ۔
ترمیم کے مطابق ججز الزامات کا تحریری جواب ادارہ جاتی ردعمل کیلئے قائم کمیٹی کو بھیجیں گے، جج میڈیا پرایسے سوال کا جواب نہیں دے گا جس سے تنازعہ کھڑا ہو، سوال میں بے شک قانونی نکتہ شامل ہو تب بھی جج جواب نہیں دے گا۔
یاد رہے کہ قاضی فائز عیسی دور میں ججز کو الزامات کا جواب دینے کی اجازت دی گئی تھی۔
اعلامیہ
سپریم جوڈیشل کونسل کے اجلاس کا اعلامیہ جاری کر دیا گیاہے ، اجلاس میں 67 شکایات کا جائزہ لیا گیا، اجلاس میں 65 شکایات کو داخل دفتر کردیا گیا، ایک شکایت پر کارروائی کو مؤخر کردیا گیا جبکہ ایک شکایت پر مزید کارروائی کا فیصلہ کیا گیاہے ۔
اجلاس کے دوسرے مرحلے میں 7مزید شکایات کا جائزہ لیا گیا، 7 شکایات کیلئے کونسل کی تشکیل نو کی گئی، جسٹس سرفراز ڈوگر نے ان شکایات پر کارروائی سے خود کو الگ کیا، جسٹس سرفراز ڈوگر کی جگہ جسٹس ایس ایم عتیق شاہ، چیف جسٹس پشاور ہائیکورٹ کو شامل کیا گیا، دوسرے مرحلے میں 7 میں سے 5 شکایات کو داخل دفتر کیا گیا، کونسل نے 7میں سے 2 شکایات پر مزید کارروائی کا فیصلہ کیاہے ۔
اعلامیہ کے مطابق ججز تحائف صرف قریبی رشتہ داروں یا انتہائی قریبی دوستوں سے لے سکیں گے، جج کو دیگر تمام قسم کے تحائف لینے سے انکار کرنا ہو گا، جج کسی بھی قسم کی پیشکش کا جائزہ لے گا کہ اس کا اصل مقصد کیا ہے، ججز آئینی عہدوں کے علاوہ کسی سے حلف نہیں لے سکیں گے، جج کسی سیاسی، ثقافتی، سفارتی تقریب کی صدارت نہیں کرے گا، جج بغیر کسی اثرورسوخ کے کام کرے گا، کسی بھی دباؤ کی صورت میں فوری متعلقہ چیف جسٹس کو آگاہ کرنا ہوگا، متعلقہ چیف جسٹس تین رکنی ججز کمیٹی کے سامنے معاملہ رکھیں گے۔
