لاہور کی سیشن عدالت نےامیربالاج قتل کےمقدمےمیں خواجہ عقیل عرف گوگی بٹ کی عبوری درخواست ضمانت مسترد کر دی، عدالت نےعدم پیروی کی بنیاد پر ضمانت خارج کی۔
ایڈیشنل اینڈسیشن جج نجف حیدرنے درخواست ضمانت پر سماعت کی،خواجہ عقیل عرف گوگی بٹ عبوری ضمانت کی معیاد ختم ہونے پر پیش نہیں ہوا۔ ملزم کے وکیل نے پیشی کے لیے کچھ دیر کے لیے سماعت ملتوی کرنے کی استدعا کی جسے عدالت نے منظورکرلیا۔
دوبارہ سماعت کے آغازپر ملزم کے پیش نہ ہونے پرعدالت نے عبوری ضمانت کی درخواست خارج کردی،خواجہ عقیل عرف گوگی بٹ نے امیر بالاج قتل کے مقدمے میں گرفتاری کے خدشے پر ضمانت کیلئے عدالت سے رجوع کیا تھا،تھانہ چوہنگ پولیس نے امیر بالاج کے قتل پر مقدمہ درج کیا تھا ملزم نے ضمانت میں موقف اختیار کیا کہ پولیس نے ذاتی مخالفت کی بنیاد پر مقدمے میں نامزد کیا قتل سے کوئی لینا دینا نہیں ہے عدالت عبوری ضمانت منظور کرے۔
