بالی ووڈ کے معروف اداکار رنبیر کپور نے بھارتی کرکٹر ٹیم کے بلے باز ویرات کوہلی کی بایوپک میں کردار ادا کرنے سے متعلق سوال پر دلچسپ جواب دے کر سب کو حیران کردیا۔
بھارتی میڈیا رپورٹس کے مطابق رنبیر کپور بھارت اور نیوزی لینڈ کے درمیان آئی سی سی کرکٹ ورلڈ کپ 2023ء کا پہلا سیمی فائنل دیکھنے کیلئے وانکھیڈے اسٹیڈیم پہنچے جہاں انہوں نے اینکر سے گفتگو بھی کی۔
اینکر نے بالی ووڈ اسٹار رنبیر کپور سے سوال کیا کہ کیا آپ ویرات کوہلی کی بایو پک میں کردار نبھانا پسند کریں گے؟۔ جس پر رنبیر نے فوری اور دلچسپ جواب دیتے ہوئے سب کو حیران کردیا۔
رنبیر نے کہا کہ اگر ویرات کوہلی کی زندگی پر کوئی فلم بنائی جاتی ہے تو اس میں مرکزی کردار انہیں (ویرات) کو خود نبھانا چاہئے کیونکہ وہ مجھ سے زیادہ اچھے نظر آتے ہیں اور ان کی فٹنس بھی اچھی ہے۔
رنبیر کپور کو فلم انڈسٹری کا سب سے باصلاحیت اداکار مانا جاتا ہے جنہوں نے اس شعبے میں نام کے ساتھ لاکھوں مداحوں کے دلوں میں جگہ بھی بنائی۔
بالی وڈ اسٹار رنبیر کپور ان دنوں اپنی نئی فلم ’اینیمل‘ کی ریلیز کی تیاریوں میں مصروف ہیں۔ سندیپ ریڈی کی ہدایت کاری میں بننے والی اس فلم میں بوبی دیول، انیل کپور اور رشمیکا مندانا بھی جلوہ گر ہوں گی۔
فلم اینیمل یکم دسمبر کو بھارت سمیت دنیا بھر کے سنیما گھروں میں نمائش کیلئے پیش کی جائے گی۔ واضح رہے کہ رنبیر کپور نے اس فلم کے بعد کسی بھی نئے پروجیکٹ کا حصہ نہ بننے کا اعلان کر رکھا ہے۔
رنبیر کپور کا کہنا ہے کہ انہوں نے اینیمل کے بعد کسی بھی فلم کیلئے وعدہ نہیں کیا کیونکہ وہ بیٹی کو وقت دینا چاہتے ہیں، 6 ماہ کا بریک لیا ہے اور یہ وقت اپنی بیوی عالیہ اور بیٹی راحا کے ساتھ گزاروں گا۔
