آٹوموٹیو انڈسٹری ڈیویلپمنٹ اینڈ ایکسپورٹ پالیسی دو ہزاراکیس تا چھبیس ناکام ہو گئی,پانچ سال میں گاڑیوں اور پرزہ جات کی دس فیصد لازمی برآمد کا ہدف پورا نہ ہوسکا،آڈیٹر جنرل نے ناکامی کی وجوہات جاننے کے لیے انکوائری کی ہدایت کر دی۔
آڈٹ رپورٹ کےمطابق کار مینوفیکچررز اور وزارت صنعت وپیداوار برآمدات بڑھانے اور صارفین کا تحفظ کرنےمیں ناکام رہے،قیمت وصول کرنے کےباوجود گاڑیاں بروقت فراہم نہ کی گئیں جبکہ اون منی کی وصولی اورلیٹ ڈیلیوری سنگین مسئلہ قراردیا گیا،
رپورٹ کے مطابق کارسازکمپنیاں 20 فیصد ڈاؤن پیمنٹ پالیسی پر بھی عمل نہ کر سکیں اور نہ ہی گاڑیوں کی بکنگ، ڈیلیوری اور رقوم کی واپسی کا ریکارڈ پیش کیا۔
دستاویز کےمطابق انجینئرنگ ڈیویلپمنٹ بورڈ ایکسپورٹ کا ڈیٹا اکھٹا نہ کرسکا اور غیرقانونی چینلز کے ذریعے پرزہ جات کی درآمد کی بھی نشاندہی کی گئی۔
آڈیٹرجنرل نے پالیسی پر عملدرآمد میں ناکامی کو انتظامیہ کی سنگین کوتاہی قرار دیتے ہوئے مستقبل میں مؤثر اقدامات پر زور دیا ہے۔
