چیئرمین پیپلز پارٹی بلاول بھٹو زرداری نے قصور میں سیلاب متاثرین سے ملاقات کے بعد وزیراعظم شہبازشریف سے ٹیلیفونک رابطہ کیا اور قصور کے کاشتکاروں کے تحفظات سامنے رکھے ۔
ذرائع کے مطابق چیئرمین بلاول بھٹو زرداری نے وزیراعظم شہباز شریف کو پنجاب بھر کے کسانوں کے مسائل سے آگاہ کیا، چیئرمین پیپلز پارٹی نے وزیراعظم سے مکالمہ کرتے ہوئے کہا کہ موجودہ سیلاب کی وجہ سے پنجاب میں زراعت کے شعبے کو شدید نقصان پہنچا ہے۔
بلاول نے کہا کہ آج قصور میں کسانوں کے مسائل سنے، وفاق کو پنجاب بھر کے کسانوں کی مدد کیلئے اپنا کردار ادا کرنا ہوگا، وفاق پنجاب کی صوبائی حکومت کے ساتھ مل کر صوبے کے کسانوں کو ریلیف فراہم کرے، پنجاب میں آفت زدہ اضلاع کے کسانوں کے بجلی کے بل معاف کئے جائیں۔
بلاول بھٹو زرداری نے مطالبہ کیا کہ زرعی قرضوں کی ادائیگی آفت زدہ اضلاع کے کسانوں کیلئے بڑا مسئلہ ہے، اس ادائیگی کو معاف کیا جائے یا تاخیر سے ادائیگی کی رعایت دی جائے، آفت زدہ اضلاع کے کسانوں کی دادرسی کیلئے بینظیر انکم سپورٹ پروگرام کے تحت انہیں نقد رقم ٹرانسفر کی جائے۔
وزیراعظم شہبازشریف نے چیئرمین بلاول بھٹو زرداری کو یقین دہانی کروائی کہ پنجاب میں آفت زدہ اضلاع کے کسانوں کے لئے وفاقی حکومت ہر ممکن اقدامات کرے گے۔
