سپریم کورٹ کے انتظامی امور سے متعلق فل کورٹ اجلاس 8 ستمبر کو طلب کرلیا گیا۔
ذرائع کے مطابق چیف جسٹس یحییٰ آفریدی کی زیر صدارت فل کورٹ اجلاس دن ایک بجے ہوگا۔ اجلاس صرف ایک نکاتی ایجنڈا پر مشتمل ہوگا۔ فل کورٹ اجلاس میں سپریم کورٹ رولز 2025 میں ترامیم کا جائزہ لیا جائے گا۔
صدر سپریم کورٹ بار ایسوسی ایشن نے تحریری تجاویز سپریم کورٹ کو بھجوائی ہیں، تجاویز میں عدالتی فیسوں میں اضافے کی واپسی کا بھی مطالبہ کیا گیا تھا۔ سپریم کورٹ بار کی تجاویز پر فل کورٹ میں غور ہوگا۔
ذرائع کے مطابق کسی جج نے تاحال رولز میں ترامیم کیلئے تجاویز جمع نہیں کروائیں، سپریم کورٹ رولز 2025 سرکولیشن کے ذریعے منظور کرائے گئے تھے۔
اختلاف کرنے والے ججز کی رائے تھی فل کورٹ اجلاس سے رولز کی منظوری کرائی جائے، اختلاف کرنے والے ججز نے 15 دن گزرنے کے باوجود کوئی تجاویز نہیں دیں۔
انتظامی فل کورٹ سے قبل سپریم کورٹ میں نئے عدالتی سال کی تقریب کا اہتمام ہوگا، نئے عدالتی سال پر سپریم کورٹ میں قائم کیے گئے سہولت مرکز کا افتتاح بھی کیا جائے گا۔
