انٹرنیشنل کرکٹ کونسل نے کھلاڑیوں کی تازہ ترین ون ڈے رینکنگ جاری کردی۔ سکندر رضا نمبر ون آل راؤنڈر بن گئے، بیٹرز میں شبمن گل اور بولرز میں کیشو مہاراج ٹاپ پوزیشن پر ہیں۔
آئی سی سی نے ون ڈے کی تازہ پلیئرز رینکنک جاری کردی، پاکستانی نژاد زمبابوین کھلاڑی سکندر رضا نمبر ون آل راؤنڈر بن گئے، سکندر رضا نے سری لنکا کیخلاف لگاتار 2 نصف سنچریاں اور ایک وکٹ لے کر رینکنگ میں پہلی پوزیشن حاصل کی۔
ون ڈے بیٹرز رینکنگ میں بھارت کے شبمن گل کا پہلا نمبر برقرار ہے، بھارت کے روہت شرما دوسرے اور پاکستان کے بابر اعظم تیسری پوزیشن پر موجود ہیں۔
سری لنکن اوپنر پاتھم نسانکا 7 درجے ترقی کے بعد 13ویں نمبر پر پہنچ گئے جبکہ پاکستان کے محمد رضوان 26ویں اور فخر زمان 27ویں نمبر پر موجود ہیں۔
ون ڈے بولرز رینکنگ میں جنوبی افریقی اسپنر کیشو مہاراج سرفہرست ہیں، سری لنکا کے مہیش تھکشانا کا دوسرا نمبر ہے جبکہ انگلینڈ کے جوفرا آرچر پہلی بار ون ڈے بولنگ رینکنگ میں ٹاپ 20 میں شامل ہوگئے، ان کا نمبر 19واں ہے۔
رپورٹ کے مطابق افغان بیٹر ابراہیم زادران ٹی 20 بیٹرز کی رینکنگ میں 12 درجے بہتری کے بعد 20ویں نمبر پر آگئے، پاکستان کے سفیان مقیم ٹی 20 بولرز میں 11 درجے بہتری کے ساتھ 22ویں نمبر پر آگئے۔
