وزیراعظم شہبازشریف کی زیر صدارت وفاقی کابینہ کے اجلاس میں ملک بھر میں بارشوں اور سیلابی صورتحال میں جاں بحق ہونے والے افراد کیلئے فاتحہ خوانی کی گئی جبکہ سیلاب سے متاثرہ علاقووں کا دورہ کرنے پر کابینہ اراکین کا خصوصی شکریہ بھی ادا کیا ۔
اعلامیے کے مطابق وفاقی کابینہ میں یوریا کی قیمتوں مین توازن کے حوالے سے سفارشات پیش کی گئیں اور وزیراعظم نے کہا کہ کسانوں کی پیداوار میں اضافے کیلئے ان کی پیداواری لاگت کو کم کرنا ہو گا۔ جس کیلئے مصدق ملک، علی پرویز ملک ، رانا تنویر حسین، محمد علی اور ہارون اختر پر مشتمل کمیٹی قائم کر دی گئی ۔
وفاقی کابینہ کے اجلاس میں یوٹیلٹی اسٹورز کارپوریشن کی تحلیل کی سمری کو متفقہ طور پر منظور کر لیا گیا، سمری کے مطابق 31 جولائی سے ملک بھر میں یوٹیلٹی اسٹورز کا آپریشن ختم کر دیا گیا ہے، وزیراعظم کی ہدایت پر ملازمین کے حقوق کا مکمل خیال رکھا جائے گا۔
وزیراعظم نے ملازمین کے حقوق کیلئے تمام ترقانونی و دیگر ضابطوں کو مد نظر رکھنے کی ہدایت کی ۔
اجلاس میں خصوصی اقتصادی زونز قانون 2012 ء میں ترمیم کی اصولی منظوری دیدی گئی ۔ شہبازشریف نے کہا کہ ملکی صنعتی ترقی کیلئے کاروبار و سرمایہ کار دوست ماحول فراہم کرنا انتہائی ضروری ہے، اللہ کے فضل و کرم سے ملکی معیشت مستحکم اور ترقی کی راہ پر گامزن ہے،صنعتوں کی تعمیر سے ملکی برآمدات اور روزگار میں اضافہ ہو گا۔
وفاقی کابینہ نے قومی اقتصادی کونسل کی مالی سال 2023-24ءکی سالانہ رپورٹ پارلیمنٹ میں پیش کرنے کی منظوری بھی دیدی جبکہ اقتصادی رابطہ کمیٹی کے 19اگست 2025ء کو منعقدہ اجلاس کے فیصلوں ، کابینہ کمیٹی قانون سازی کیسز کے 18 اگست 2025 ء کو منعقدہ اجلاس کے فیصلوں کی توثیق بھی کر دی ۔
