چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے ازبکستان کا سرکاری دورہ کیا ہے جہاں انہوں نے ازبک سیاسی و عسکری قیادت سے ملاقاتیں کی ہیں۔
پاک فوج کے شعبہ تعلقات عامہ ( آئی ایس پی آر ) کی جانب سے جاری کردہ بیان کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے ازبک صدر شوکت مرزیویف، وزیر دفاع میجر جنرل شکرت خولمخمیدوف اور سیکرٹری قومی سلامتی لیفٹیننٹ جنرل وکٹر مخمودوف سے ملاقاتیں کیں۔
آئی ایس پی آر کے مطابق ان ملاقاتوں میں باہمی دلچسپی کے امور اور اہم عالمی و علاقائی سلامتی کے معاملات پر تبادلہ خیال کیا گیا۔
فریقین نے دفاع، سلامتی، سڑک و ریل رابطوں اور دوطرفہ تعلقات کو مزید مضبوط بنانے کے عزم کا اعادہ کیا۔
جنرل ساحر شمشاد مرزا نے پاکستان اور ازبکستان کے گہرے برادرانہ تعلقات پر روشنی ڈالتے ہوئے علاقائی امن، استحکام اور خوشحالی کے فروغ کے مشترکہ عزم پر زور دیا۔
ازبک قیادت نے پاکستان کی مسلح افواج کی پیشہ وارانہ مہارت کی تعریف کی اور دہشت گردی کے خلاف جنگ میں ان کی قربانیوں کا اعتراف کیا۔
