ملک کے مختلف شہروں میں چینی کے سرکاری نرخوں کی کھلی خلاف ورزی جاری ہے، اسلام آباد، پشاور اور کراچی میں 173 کے بجائے 190 روپے فی کلو تک فروخت کی جارہی ہے ۔ ہفتہ وار مہنگائی میں بھی مسلسل دوسرے ہفتے اضافہ دیکھنے میں آیا ہے ، شرح 0.31 فیصد بڑھ کر 2.21 فیصد ریکارڈ کی گئی۔
رپورٹ کے مطابق گزشتہ ہفتے 17 اشیائے ضروریہ کی قیمتوں میں اضافہ ہوا، 9 اشیاء کی قیمتوں میں کمی،24 کے دام مستحکم رہے، ٹماٹر، چکن، انڈے، پیاز، لہسن، گندم کا آٹا، گڑ، دال ماش، لکڑی مہنگی ہوئی جبکہ کیلے، آلو، دال چنا، مونگ، مسور، گھی، نمک، چاول، ایل پی جی سستی ہوئی ۔
ایک ہفتے میں ٹماٹر کی قیمت میں 10 روپے 42 پیسے فی کلو ، چکن 19 روپے 67 پیسے، انڈے فی درجن 6 روپے 19 پیسے مہنگے ہوئے ، ایک ہفتے کے دوران چینی فی کلو 52 پیسے تک مہنگی ہوگئی، گزشتہ ہفتے کے دوران گندم کا آٹا 21 روپے 18 پیسے فی تھیلا مہنگا ہوا۔
گزشتہ ایک ہفتے کے دوران کیلے فی درجن تقریباً 4 روپے سستے ہوئے، ایک ہفتے کے دوران آلو ایک روپے 37 پیسے تک سستے ہوئے، گزشتہ ہفتے ایل پی جی کا گھریلو سیلنڈر 10 روپے 39 پیسے سستا ہوا، دال مسور،چنے،چاول اور نمک بھی سستی ہونے والی اشیا میں شامل ہیں ۔
تازہ دودھ، دہی، سگریٹ، بریڈ سمیت 25 اشیا کی قیمتیں مستحکم رہیں۔
