پبلک اکاؤنٹس کمیٹی ( پی اے سی ) نے حج پر ساتھ جانے والے تمام گریڈز کے ملازمین کی تفصیلات طلب کرلیں۔
چیئرمین جنید اکبر خان کی زیر صدارت پارلیمنٹ کی پبلک اکاؤنٹس کمیٹی کا اجلاس ہوا جس میں حج پر ساتھ جانے والے تمام گریڈز کے ملازمین کا معاملہ زیر غور آیا۔
اجلاس کے دوران کمیٹی ممبر سینیٹر بلال احمد نے سوالات کیے کہ 2 سال سے آپ اسٹاف کیلئے ٹیسٹ لیتے ہیں وہ کیسے ہوتا ہے؟ اور ٹیسٹ میں کتنے لوگ آتے ہیں اور آپ کی ضرورت کتنی ہوتی ہے؟۔
کمیٹی ممبر سینیٹر افنان اللہ نے سوال کیا کہ ججز، سیاستدان اور بیوروکریسی سے کتنے لوگ ساتھ جاتے ہیں؟۔
سیکرٹری مذہبی امور نے ممبران کے سوالوں کے جواب میں بتایا کہ ساتھ جانے والے اسٹاف میں سارے سرکاری ملازم ہوتے ہیں اور گریڈ 7 سے لے کر گریڈ 18 کے ملازمین عملے میں شامل ہوتے ہیں۔
سیکریٹری مذہبی امور نے بتایا کہ گزشتہ سال 130 لوگ آرمڈ فورسز سے ساتھ گئے تھے۔
کمیٹی ممبر شیخ وقاص اکرم نے سوال کیا کہ گریڈ 18 کے کتنے افسران کو حج پر بھیجا جاتا ہے؟ ، جس پر سیکرٹری نے بتایا کہ پچھلے سال 64 ہزار لوگوں نے ٹیسٹ کیلئے اپلائی کیا جن میں سے 1700 رکھے گئے۔
سیکریٹری مذہبی امور نے بتایا کہ پچھلے سال گریڈ 18 کے 350 افسران کو حاجیوں کے ساتھ بھیجا گیا تھا۔
بعدازاں، پبلک اکاؤنٹس کمیٹی ( پی اے سی ) نے حج پر ساتھ جانے والے تمام گریڈز کے ملازمین کی تفصیلات طلب کرلیں۔
