مسلم لیگ ( ن ) پنجاب کے صدر رانا ثنا اللہ نے تمام ضلعی عہدیداروں کو ضمنی اور بلدیاتی انتخابات کی تیاریوں کی ہدایات کردیں۔
ہفتے کو ماڈل ٹاؤن لاہور پارٹی سیکرٹریٹ میں مسلم لیگ ن پنجاب کی تنظیم سازی کے حوالے سے اہم اجلاس ہوا جس کی صدارت پنجاب کے صدر رانا ثنا اللہ نے کی جبکہ اجلاس میں تمام ڈویژنل کوآرڈینیٹر اور تنظیمی عہدیداران نے شرکت کی۔
پنجاب کے تنظیمی عہدیداروں نے وفاق اور پنجاب کی حکومتوں پر مکمل اعتماد اوراطمینان کا اظہارکیا۔
اجلاس سے خطاب کرتے ہوئے رانا ثنا اللہ نے کہا مریم نواز کی کارکردگی کے باقی صوبے بھی معترف ہیں اور ان کی کارکردگی کی بدولت پنجاب میں پارٹی کی مقبولیت بڑھ رہی ہے۔
رانا ثناء اللہ کا کہنا تھا کہ وفاقی حکومت کی بھی اللہ تعالی نے بہت مدد فرمائی ہے اور وزیراعظم شہبازشریف ملکی وقاربحال کرنے کے لئے دن رات محنت کر رہے ہیں۔
انہوں نے کہا حکومت کی خارجہ پالیسی کامیابیوں سے ہمکنار ہو رہی ہے۔ اور پاکستان نے بھارت کے خلاف اللہ کی مدد سے بڑی فتح حاصل کی ہے جبکہ نوازشریف کی قیادت میں مسلم لیگ ن ایک مرتبہ پھر پاکستان کو بحرانوں سے نکال رہی ہے۔
انہوں نے پنجاب کے بلدیاتی انتخابات کی تیاریوں کے حوالے سے تمام ضلعی عہدیداروں کو ضمنی اور بلدیاتی انتخابات کی تیاریوں کی ہدایات کی اور کہا جلد پارٹی قیادت سے مشاورت کے بعد موزوں امیدواروں کا اعلان کرے گی۔
