پاکستان افغانستان اور یو اے ای کے درمیان سہ فریقی سیریز کے دوران افغان شائقین کو کنٹرول کرنے کیلئے شارجہ اسٹیڈیم انتظامیہ نے نئی حکمت عملی بنالی۔
پی سی بی کے مطابق پاکستان، افغانستان اور یو اے ای کے درمیان 29 اگست سے 7 ستمبر تک شارجہ میں سہ فریقی کرکٹ سیریز کھیلی جائے گی، پاک افغان میچ 29 اگست اور 2 ستمبر کو کھیلا جائے گا۔
ذرائع کا کہنا ہے کہ ٹرائی نیشن سیریز کے دوران افغان شائقین کو کنٹرول کرنے کیلئے شارجہ اسٹیڈیم انتظامیہ نے نئی حکمت عملی تیار کرلی، اگست اور ستمبر میں ہونے والی ٹرائی نیشن سیریز کیلئے نئے قوانین لاگو ہونے کا امکان ہے۔
ٹرائی نیشن میچ میں پاک افغان میچ کیلئے شائقین کو الگ الگ انٹری کروائے جانے کا امکان ہے، پاکستانی شائقین کو الگ انکلوژرز جبکہ افغانی شائقین کیلئے الگ راستہ ہوگا۔
ذرائع کا کہنا ہے کہ افغانی شائقین جذباتی ہوجاتے ہیں شارجہ اسٹیڈیم انتظامیہ نے الگ الگ بٹھانے کا فیصلہ کیا ہے، پاک افغان شائقین میں ماضی میں متعدد مرتبہ ناخوشگوار واقعات رپورٹ ہوچکے ہیں۔
واضح رہے کہ ایشیاء کپ میں نسیم شاہ کے چھکوں کے بعد شارجہ اسٹیڈیم میں افغانی شائقین نے پاکستانی شائقین پر حملے کیے تھے، پاکستان افغانستان میچ میں شائقین کی بڑی تعداد میچ دیکھنے آتی ہے، حالات آپے سے باہر ہوجاتے ہیں۔
رپورٹ کے مطابق 2019ء میں ورلڈ کپ کے دوران لیڈز اسٹیڈیم میں افغانی شائقین نے پاکستانی شائقین کے ساتھ لڑائیاں کی تھیں۔
