لاپتہ افراد کی آڑ میں دہشت گردی کے ناقابل تردید شواہد منظرعام پر آگئے، قلات آپریشن میں مارا گیا دہشت گرد صہیب لانگو بلوچ یکجہتی کمیٹی کی نام نہاد لاپتہ افراد کی فہرست میں شامل ہے۔
سیکیورٹی ذرائع کے مطابق اس سے قبل بھی فتنہ الہندوستان کے مارے جانے والے متعدد دہشت گرد نام نہاد لاپتہ افراد لسٹ میں شامل تھے، مارچ 2024ء میں گوادر حملے میں مارا جانے والا دہشت گرد کریم جان بھی لاپتہ افراد کی فہرست میں شامل تھا، نیول بیس حملے میں مارا گیا دہشت گرد عبدالودود کا نام بھی لاپتہ افراد لسٹ کا حصہ تھا۔
رپورٹ کے مطابق ماہ رنگ لانگو نے نام نہاد لاپتہ افراد کا بیانیہ ہمیشہ اپنے مذموم عزائم اور ریاست کو بدنام کرنے کیلئے استعمال کیا، 21 جولائی کو مارے گئے دہشت گرد صہیب کی ماہ رنگ لانگو کے ساتھ مظاہروں میں کئی تصاویر اور ویڈیوز سوشل میڈیا پر موجود ہیں۔
رپورٹ میں بتایا گیا ہے کہ نام نہاد لاپتہ افراد وہی ہیں جو فتنہ الہندوستان کے آلۂ کار بن کر نہتے اور معصوم پاکستانیوں پر دہشتگرد حملوں میں ملوث ہیں، فتنہ الہندوستان نے دہشتگرد صہیب لانگو عرف عامر بخش کی ہلاکت اور خود سے وابستگی کو تسلیم کیا۔
حقائق سے واضح ہے کہ جن لوگوں کو لاپتہ افراد بناکر پیش کیا جاتا ہے وہ فتنہ الہندوستان کے دہشت گرد ہیں۔
