ترجمان دفتر خارجہ نے کہا ہے کہ پاکستان ہر قسم کی دہشتگردی کی مذمت کرتاہے ، زیر وٹالرنس اور دہشتگردی کیخلاف بین الاقوامی تعاون ہماری پالیسی کی بنیاد ہے ۔
ترجمان نے ہفتہ وار بریفنگ دیتے ہوئے کہا کہ پاکستان دہشتگردی کیخلاف فرنٹ لائن ریاست رہا ہے، دہشتگردشریف اللہ کی گرفتاری سمیت انسداد دہشتگردی کے ذریعے عالمی امن میں زبردست کردار ادا کیا ہے، بین الاقوامی تسلیم شدہ متنازع علاقے میں پہلگام واقعے کی تحقیقات ابھی تک بے نتیجہ ہے، کالعدم تنظیم لشکرطیبہ سے کوئی بھی تعلق زمینی حقائق کے منافی ہے۔
شفقت علی خان نے کہا کہ پاکستان نے مؤثر طریقے اور جامع حکمت عملی سے متعلقہ تنظیموں کو ختم کر دیا ہے، ایسی تنظیموں کی قیادت کو گرفتار کیا ہے،مقدمہ چلایا ہے، بھارت کا پاکستان مخالف پروپیگنڈے کو آگے بڑھانے کا ٹریک ریکارڈ موجود ہے، بھارت ایسے پروپیگنڈے مقبوضہ کشمیر سے بین الاقوامی توجہ ہٹانے کیلئے کرتا رہتا ہے، پاکستان بے مثال قربانیاں دے کر انسداد دہشت گردی کی حمایت جاری رکھے ہوئے ہے،
ترجمان نے کہا کہ عالمی برادری اجتماعی کوششوں کے ذریعے عالمی خطرے سے نمٹنے کیلئے غیر امتیازی پالیسیاں اپنائے، ضروری ہے مجید بریگیڈ جیسی دہشتگرد تنظیموں کو بھی بی ایل اےکی طرح کالعدم قرار دیا جائے۔
