نیشنل سائبر کرائم انویسٹی گیشن ایجنسی (این سی سی آئی اے) لاہور زون نے علیمہ خان کو ریاست مخالف سوشل میڈیا سرگرمیوں میں ملوث ہونے کے الزامات کے تحت نوٹس جاری کردیا۔
ذرائع کے مطابق علیمہ خان کو 17 جولائی کو ذاتی طور پر پیش ہونے کی ہدایت کی گئی ہے اور نوٹس میں کہا گیا ہے کہ طلبی کا مقصد ان سے ان کے دفاع میں بیان ریکارڈ کرنا ہے۔
علیمہ خان پر الزام لگایا گیا ہے کہ وہ سوشل میڈیا کے ذریعے ریاست مخالف سرگرمیوں میں ملوث رہی ہیں اور اگر ملزمہ پیش نہ ہوئیں تو یہ تصور کیا جائے گا کہ ان کے پاس دفاع میں کچھ نہیں۔
ذرائع نے مزید بتایا کہ عدم حاضری کی صورت میں قانونی کارروائی کو آگے بڑھایا جائے گا۔
یاد رہے کہ نیشنل سائبر کرائم انویسٹی گیشن ایجنسی وزارت داخلہ کے ماتحت ادارہ ہے۔
