انڈونیشیا کے وزیر دفاع لیفٹیننٹ جنرل (ریٹائرڈ) سجافری سجام الدین نے جنرل ہیڈکوارٹرز (جی ایچ کیو) راولپنڈی میں چیف آف آرمی سٹاف فیلڈ مارشل سید عاصم منیر سے ملاقات کی ہے جس میں دوطرفہ دفاعی تعاون، علاقائی سلامتی کے امور اور فوجی تعلقات کو مزید مضبوط بنانے پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق انڈونیشین وزیر دفاع نے مختلف سروسز اور انٹیلی جنس ایجنسیوں کے نمائندوں پر مشتمل وفد کی قیادت کی جبکہ ملاقات میں دونوں ممالک کے درمیان دفاعی تعاون کے موجودہ اقدامات کا جائزہ لیا گیا اور نئے مواقع تلاش کرنے پر اتفاق کیا گیا۔
ملاقات میں پاکستان اور انڈونیشیا کے درمیان دیرینہ دوستی اور تعاون کے فروغ پر زور دیا گیا۔
فیلڈ مارشل عاصم منیر نے خطے میں امن و استحکام کے لیے باہمی تعاون کی اہمیت کو اجاگر کیا۔
انڈونیشیا کے وزیر دفاع نے دہشت گردی کے خلاف جنگ میں پاک فوج کے کردار کو سراہا اور پاکستان کے ساتھ دفاعی تعلقات کو مزید وسعت دینے کے لیے انڈونیشیا کے عزم کا اعادہ کیا۔
