اگلے 12 گھنٹوں کے دوران مختلف علاقوں میں بارش، آندھی ، طوفان اور گلاف کا الرٹ جاری کردیا گیا۔
ترجمان این ڈی ایم اے کے مطابق شمالی علاقوں میں درجہ حرارت میں مسلسل اضافے کے باعث گلیشیائی علاقوں میں گلاف کا خطرہ بڑھ گیا ہے۔
ترجمان نے ہدایت کی ہے کہ ہنزہ ، شگر، گانچھے اور چترال کے دریاؤں کے قریب رہائشی محتاط رہیں اور پی ڈی ایم اے خیبرپختونخوا،جی بی ڈی ایم اے اور ڈی ڈی ایم اے کو حساس علاقوں کی نگرانی کریں ۔
الرٹ کے مطابق اسلام آباد سمیت پنجاب کے مختلف اضلاع میں تیزہواؤں کے ساتھ موسلادھار بارش کا امکان ہے جبکہ شہری علاقوں میں ممکنہ طور پر سیلابی صورتحال کا خدشہ ہے۔
بلوچستان کے مختلف اضلاع میں تیز ہواؤں کےساتھ موسلادھار بارش کا امکان ہے اور اربن فلڈنگ، لینڈ سلائیڈنگ اورسڑکوں پرٹریفک کی روانی متاثرہونے کا خدشہ ہے۔
ترجمان کا کہنا تھا کہ بارشوں کے باعث ندی نالوں میں پانی کے بہاؤ میں اچانک اضافہ ہوجاتا ہے لہذا عوام نالوں، دریاؤں اور تیز بہاؤ والی آبی گزرگاہوں کے قریب نہ جائیں جبکہ سیاح بھی گلیشیئر کے قریبی علاقوں میں جانے، تصاویر بنانے یا ٹریکنگ سے گریز کریں۔
