وفاقی وزیر ریلوے حنیف عباسی نے کہاہے کہ خواجہ آصف مجھ سے عمر میں کافی بڑے ہیں ، ان کے ساتھ تعلقات کبھی آئیڈیل نہیں رہے ہیں، آپ اتنے سینئر سیاستدان ہیں مگر اپنی ہی جماعت کو ہائبرڈ نظام کا طعنہ دیتے ہیں ، موجودہ نظام ہائبرڈ نہیں ہے ، میں نہیں مانتا ، یہ سارے فیصلے پارٹی کے ہیں ، پھر آپ کہتے ہیں میں پالیسی فالو کرتاہوں ۔
سماء نیوز کے پروگرام ریڈ لائن میں گفتگو کرتے ہوئے حنیف عباسی کا کہناتھا کہ تنخواہ میں اضافےکی منظوری کابینہ دیتی ہے، نہیں چاہتااتنی تنخواہ بڑھائی جائے کہ سوالیہ نشان ہو، خواجہ آصف کہتےہیں میں باہربات نہیں کرتا،یہ باہرہی بات ہوگئی، ایاز صادق ہمارے اسپیکر ہیں ،خیال رکھنا چاہیے۔
ان کا کہناتھا کہ ڈونلڈ ٹرمپ اس کی عزت کرتے ہیں جو طاقتور ہو جس طرح فیلڈمارشل کو عزت ملی کسی اور کو نہ ملی ، فیلڈ مارشل کہہ رہے ہیں وزیراعظم سیسہ پلائی دیوار کی طرح کھڑے ہیں، بھارت شکست خوردہ ہے اور اپنے زخم چاٹ رہا ہے۔ انہوں نے کہا کہ بانی سے جیل میں ملاقات کی ایسی کوئی سوچ نہیں ہے، وزیراعظم 3بار پی ٹی آئی والوں کو پیشکش دے چکے ہیں، پی ٹی آئی والے میں نہ مانوں والی پالیسی پرتھے۔
حنیف عباسی نے کہا کہ بانی پی ٹی آئی کے قصیدے کے علاوہ ان کو کچھ یاد نہیں، شاہ محمود،یاسمین راشد و دیگر کا کوئی ذکر ہی نہیں ہے، مذاکرات کیلئے کلیئر دل و دماغ کے ساتھ آئیں، مذاکرات کیلئے اپنے معافی نامے ساتھ لیکرآئیں، معافی نامے بھی دوری پر نہیں ،جلدآجائیں گے، معافی ملےگی اس کے بعد مذاکرات ہوں گے۔
