وزیراعظم شہباز شریف نے کہا ہے کہ معیشت میں شفافیت کیلئے ڈیجیٹل ٹرانزیکشن سسٹم ناگزیر ہے۔
کیش لیس ڈیجیٹل معیشت پر ہفتہ وار اجلاس سے خطاب کرتے ہوئے وزیر اعظم شہباز شریف کا کہنا تھا کہ ڈیجیٹل سسٹم کے استعمال کے بارے میں آگاہی بڑھانا وقت کی اہم ضرورت ہے اور کیش لیس اکانومی کے حوالے سے قائم کردہ کمیٹیاں قابل عمل تجاویز پیش کریں۔
وزیر اعظم کو بتایا گیا کہ گزشتہ اجلاس کے فیصلوں پر عمل درآمد کرتے ہوئے ڈیجیٹل پیمنٹس انوویشن ، ڈیجیٹل پبلک انفراسٹرکچر اور گورنمنٹ پیمنٹس کمیٹیاں تشکیل دی جا چکیں جبکہ اسٹیٹ بینک تاجروں کے لئے ڈیجیٹل ادائیگیوں کے طریقہ کار کو آسان اور سہل بنانے کے لئے حکمت عملی ترتیب دے رہا ہے ۔
بریفنگ میں بتایا گیا کہ ڈیجیٹل ادائیگیوں میں چھوٹے کاروباروں کی شمولیت کے لئے سہل پیکج متعارف کرایا جائے گا اور ڈیجیٹل ادائیگیوں کے لئے موبائل فون ایپلی کیشنز استعمال کرنے والوں کی تعداد ساڑھے نو سے بارہ کروڑ تک لے جانے جبکہ کیو آر کوڈ استعمال کرنے والے تاجروں کی تعدد نو لاکھ سے بیس لاکھ تک لے جانے کا ہدف ہے ۔
مجموعی ڈیجیٹل ادائیگیوں کو ساڑھے سات ارب سے بارہ ارب روپے تک بڑھایا جائے گا ۔
وزیراعظم نے ہدایت کی ان تمام اہداف کو دگنا کر دیا جائے اور یہ سہولیات تمام وفاقی علاقوں ، آزاد کشمیر اور گلگت بلتستان میں بھی متعارف کروائی جائیں۔
