پاکستان مسلم لیگ ( نواز ) کے سربراہ اور سابق وزیر اعظم نواز شریف نے کہا ہے کہ ہم ایران کے ساتھ کھڑے تھے اور کھڑے رہیں گے۔
لندن میں میڈیا سے گفتگو کرتے ہوئے سابق وزیراعظم میاں نواز شریف نے اسرائیل کی جانب سے ایران پر حالیہ حملوں کی شدید مذمت کی اور پاکستان کی ایٹمی طاقت کو ملک کی خوش نصیبی قرار دیا۔
سابق وزیر اعظم نے کہا کہ پاکستان کی خوش نصیبی ہے کہ آج وہ ایٹمی طاقت رکھتا ہے اور ہم نے یہ ایٹم بم جنگ کیلئے نہیں بلکہ امن کیلئے بنایا ہے۔
نواز شریف نے ایران پر حملوں پر سوال اٹھاتے ہوئے کہا ایران پر حملہ کرنا کون سی انسانیت ہے؟۔
انہوں نے مزید کہا کہ ہم ایران کے ساتھ کھڑے تھے اور کھڑے رہیں گے۔
ان کا کہنا تھا کہ وزیر اعلیٰ پنجاب مریم نواز اور وزیر اعظم شہباز شریف کو بہترین بجٹ پیش کرنے پر مبارکباد دیتا ہوں، یہ بجٹ عوامی ریلیف اور ملکی ترقی کی طرف ایک مثبت قدم ہے۔
انہوں نے کہا کہ شہباز شریف اور مریم نواز نیک نیتی کے ساتھ کام کر رہے ہیں اور پاکستان مشکلات سے باہر نکلتا نظر آرہا ہے، پہلے تو صرف تنزلی تھی۔
