اسلام آباد ہائی کورٹ میں ججز کو تبادلہ کرکے لائے جانے کے خلاف درخواستوں پر سپریم کورٹ میں سماعت کے دوران ۔ جسٹس محمد علی مظہر نے ریمارکس دیئے آرٹیکل 175 اے کے تحت نئی تقرری ہو سکتی ہے۔ نئی تقرری اور تبادلے کے معنی الگ الگ ہیں ۔ تبادلے کے عمل میں تین چیف جسٹس شامل تھے ہر چیز ایگزیکٹو کے ہاتھ میں نہیں تھی۔
جسٹس محمدعلی مظہر کی سربراہی میں5رکنی آئینی بینچ میں ججزٹرانسفرکیس کی سماعت کی۔ اسلام آباد ہائیکورٹ کے پانچ ججوں کے وکیل بیرسٹر صلاح الدین نے جواب الجواب دلائل میں مؤقف اختیار کیا کہ ماضی میں کسی جج کی ہائیکورٹ میں مستقل ٹرانسفر کی کوئی مثال نہیں ۔ جج کے مستقل تبادلے سے آرٹیکل 175اے غیرموثر ہو جائے گا ۔ آرٹیکل 200 کے تحت جج کا صرف عبوری تبادلہ ہو سکتا ہے۔تبادلےکےعمل میں بامعنی مشاورت نہیں ہوئی۔ بلکہ حقائق کو چھپایا گیا اور غلط معلومات دی گئیں۔ سمری میں کہا گیا پنجاب سےاسلام آباد ہائیکورٹ میں صرف ایک جج ہے حالانکہ اس وقت تین جج پنجاب سے تھے۔
جسٹس محمد علی مظہر نے ریمارکس دیئے عدالت کے سامنے آئینی و قانونی نکتے کی تشریح کا معاملہ ہے ۔ آرٹیکل 175 اے کے تحت جج کی نئی تقرری ہو سکتی ہے ۔ نئی تقرری اور تبادلے کے معانی الگ الگ ہیں ۔ تبادلے کے معاملے میں 3 چیف جسٹسز شامل تھے ۔ ہر چیز ایگزیکٹو کے ہاتھ میں نہیں تھی ۔ جج سے رضامندی بھی لی جاتی ہے ۔ کیا عارضی یا مستقل تبادلہ ہوتے وقت جج اپنی سروس بھی ساتھ لائے گا ؟ بیرسٹر صلاح الدین نے جواب دیا جج اپنی سروس مراعات یا پینشن کیلئے ساتھ لائے گا ۔ سینیارٹی کے تعین کیلئے نیا عارضی حلف بھی لے گا۔
بیرسٹر صلاح الدین نے سماعت میں طویل التوا کے بجائے ، صرف ایک دن کیلئے مؤخر کرنے یا وقفےکے بعد آج ہی سماعت کی استدعا کی ۔ جسٹس محمد علی مظہر نے کہا آج کیس کی سماعت مکمل نہیں ہو سکے گی اور بینچ کے کچھ ارکان کل دستیاب نہیں ۔ اس لئے سماعت 16 جون تک ملتوی کی جاتی ہے ۔ 16 جون کو سماعت مکمل ہو گئی تو اسی روز ججوں سے مشاورت کے بعد مختصر حکم جاری کر دیا جائے گا۔
