لاہور کی انسداد دہشت گردی عدالت نے بانی پی ٹی آئی کے پولی گرافک اور فوٹوگرامیٹک ٹیسٹ کروانے کا دوبارہ حکم دے دیا۔
پولیس نے بانی پی ٹی آئی کا ٹیسٹ نہ کروانے کی رپورٹ عدالت میں جمع کروائی، جس پر عدالت نے بانی پی ٹی آئی کے پولی گرافک اور فوٹوگرامیٹک ٹیسٹ کروانے کا دوبارہ حکم دے دیا اور ٹیسٹوں کی رپورٹ 9 جون کو پیش کرنے کی ہدایت دیدیا۔
ڈی ایس پی لیگل نے عدالت کو بتایا کہ جب تک ٹیسٹ نہیں ہوں گے، تب تک تفتیش مکمل نہیں ہوگی، بانی پی ٹی آئی تفتیشی افسران کے ساتھ تعاون کریں، ہم بانی پی ٹی آئی کیساتھ تعاون کریں گے، انصاف ہوتا نظر آئے گا۔
واضح رہے کہ بانی پاکستان تحریک انصاف عمران خان نے 9 مئی کے کیسز میں تفتیش کے حوالے سے تیسری بار پولی گرافک اور دیگر ٹیسٹ کروانے سے انکار کردیا تھا۔
جمعرات کو بانی پی ٹی آئی نے تیسرے روز بھی ٹیسٹ کرانے سے تحریری طور پر انکار کیا جس کے بعد لاہور پولیس کی تفتیشی ٹیم ٹیسٹ کئے بغیر واپس روانہ ہو گئی۔ ذرائع کے مطابق بانی پی ٹی آئی نے کہا دو مرتبہ انکار کر چکا ہوں ، میں نے کسی ٹیسٹ یا تفتیش میں پیش نہیں ہونا۔
ڈی ایس پی لاہور پولیس جاوید آصف نے کہا ٹیسٹ نہیں ہوں گے تو انصاف کے تقاضے کیسے پورے ہوں گے اور تفتیش کا عمل کیسے آگے بڑھے گا ، ہم میرٹ پر کام کرنے کی کوشش کر رہےہیں لیکن عدم تعاون کا سامنا ہے۔
