استحکام پاکستان پارٹی کے سربراہ عبدالعلیم خان نے کہاہے کہ مسلمانوں کے مخالف پاکستان کو ٹارگٹ کرنا چاہتے ہیں، اسرائیل نے نہ صرف اپنے ماہرین بھیجے بلکہ پاکستان پر حملہ کرنے کیلئے بھارت کو ڈرون بھی دیئے ، بھارت اسرائیل کی ساری ٹیکنالوجی استعمال کر رہا تھا ۔ یہ فوج صرف پاکستان کی نہیں بلکہ عالم اسلام کی فوج ہے ، یہ سپہ سالار عاصم منیر صرف پاکستان کا نہیں بلکہ پورے عالم اسلام کا سپہ سالار ہے ۔ پاکستان نے مودی کے غرور کو ڈیڑھ گھنٹے میں خاک میں ملا دیاہے ، جو افواج پاکستان کے خلاف باتیں کرتے تھے ان کے منہ بند ہونے میں بھی ڈیڑھ گھنٹہ لگا، مشکل وقت میں پاکستان کے ساتھ کھڑے ہونے والے ہمارے دوست چین ، ترکیہ ہیں، ہمیں ڈرون کی ٹیکنالوجی ترکیہ نے دی، جن سے بھارتی جہازوں کو گرایا وہ ٹیکنالوجی چین نے دی۔
استحکام پاکستان پارٹی کے سربراہ عبدالعلیم خان نے معرکہ حق کنونشن سے خطاب کرتے ہوئے کہا کہ کچھ عرصہ قبل جب یہ معرکہ نہیں ہوا تھا تو سوشل میڈیا پر بہت سی باتیں سنتے تھے، کچھ ایسے لوگ بھی تھے جو پوچھتے تھے کہ فوج کس لیئے رکھی ہوئی ہے ، یہ فوج کا خرچہ کیوں ادا کر رہے ہیں، لیکن جب 6 مئی آئی تو پتا چلا کہ ہمارے پاس ایک ایسا مکار ہمسایہ موجود ہے جس نے پچھلے 80 سال سے پاکستان کے وجود کو تسلیم نہیں کیا ، وہ آج بھی پاکستان کے خلاف ہے ، اسی طرح جو نفرت 1947 میں تھی وہ نفرت پاکستان کے خلاف آج بھی ویسے ہی اس کے اندر موجود ہے ، جس کا اظہار اس نے 6 تاریخ کو پاکستان پر رات کی تاریکی میں ہمارے معصوم بچوں کو نشانہ بنا کر کیا ۔
عبدالعلیم خان کا کہنا تھا کہ سب سے پہلے ہمارے معصوم بچوں کی شہادت ہوئی، اگلے تین دن قوم اور پوری دنیا نے دیکھا کہ کس طریقے سے پاکستان پر دشمن حملہ آور ہوا، یہاں پر ڈرون آئے اور پاکستان کو نشانہ بنایا، پاکستان کی تنصیبات پر میزائلوں سے حملہ کیا گیا ، ہمارے ایئر پورٹ پر میزائل مارے گئے، پوری دنیا نے دیکھا کہ وہ فوج جو تین دن تک اپنے جذبات کو قابو میں رکھ کر بیٹھی تھی ، اس بات پر کہ کہیں بات بہت آگے نہ بڑھ جائے ، ہم ایک ایٹمی ملک ہیں ، جب ایٹمی طاقت ہوتی ہے تو آپ جذباتی نہیں ہو سکتے ، تو ذمہ داری کا احساس کرنا پڑتاہے ، ہماری افواج نے اس ذمہ داری کا احساس کیا ، ہم نے تین دن تک بڑے احسن طریقے سے چیزوں کو بڑھنے نہیں دیا لیکن دشمن نے سمجھا کہ یہ کمزور ہے، دشمن نے ہمارے جواب نہ دینے کو بزدلی سمجھ لیا تھا ، پھر پوری قوم نے دیکھا جب انہوں نے ہمارے ایئر پورٹ کو نشانہ بنایا تو ہمارے ایک جنرل نے آ کر جو ڈی جی آئی ایس پی آر ہیں، انہوں نے رات اڑھائی بجے کہا کہ ہندوستان والو اب اپنی تیاری پکڑو ، ہم نے ان کو للکارا ، رات کے اندھیرے میں حملہ نہیں کیا، ہم نے کہا اپنا بندوبست کر لو ہم آ رہے ہیں، پھر ہم نے انتظار کیا کہ فجر کی اذان ہو جائے ، جب صبح ہو جائے اس وقت وار کریں گے ، ہم نے تاریکی میں وار نہیں کیا ۔
انہوں نے کہا کہ جس وقت ہم نے وار کیا تو پوری دنیا کو پتا لگا کہ اب پاکستان نے وار کیا، ڈیڑھ گھنٹے میں پاکستان نے بھارت کا وہ حال کیا جس کے بعد وہ پوری دنیامیں معافیاں مانگتے پھرتے تھے ، جا کر امریکی صدر کی منتیں کیں کہ ہمیں بچا لو، جنہیں بڑا گھمنڈ تھا کہ ہمارے پاس بڑے پیسے اور بڑی تجارت ہے ،پاکستان کیا چیز ہے ، بھارت کو اور اس کے وزیراعظم کو منتیں کرنی پڑیں، امریکہ کے صدر نے کہا کہ ان کے درمیان مصالحت میں نے کروائی ہے ، ورنہ پاکستان نے تو انہیں چھوڑنا نہیں ٹھا ، ہم نے سارے اہداف کو کامیابی سے نشانہ بنایا، میں سپہ سالار اور افواج پاکستان کو دل کی گہرائیوں سے خراج تحسین پیش کرتاہوں ، سپہ سالار نے پہلے فجر کی نماز کی امامت کی اور پھر کہا کہ اللہ اکبر ، ہم نے وار شروع کر دیا، جب ہم میزائل مار رہے تھے تو ہمارے فوجی اللہ اکبر کا نعرہ لگا رہے تھے ، الحمدو اللہ جس دشمن کو بڑا غرور تھا اپنی امارات ، تعلقات ، فوج ، پیسے پر گھمنڈ تھا، اس سے ڈیڑھ گھنٹہ بھی برداشت نہیں ہوا، وہ مودی جو ہمیں للکارتا تھا ، وہ جو کہتا تھا کہ ہم اس ملک کو ختم کر دیں گے ، اس کے بعد مودی نے پوری دنیا کو فون کر کے کہا کہ ہمیں پاکستان سے بچاو ، وہ قوم جس نے برداشت کیا تین دن، اس نے ڈیڑھ گھنٹے میں بھارت کا غرور خاک میں ملا دیا، میں نے اس کے بعد مودی کیلئے ٹویٹ کیا جس میں کہا کہ ’ تسلی ہے یا کچھ اور بھی خواہش ہے تو بتائیں وہ بھی پوری کر دیتے ہیں ‘‘ ۔
صدر آئی پی پی کا کہنا تھا کہ ہم نے اس معرکے میں دشمن کے چھ جہاز گرائے ، پاکستان کے ایک جہاز کو بھی آنچ نہیں آئی، وہ ایک بھی جہاز کو نشانہ نہیں بنا سکے، وہ جہاز جس پر انہیں گھمنڈ تھا، کہتے تھے کہ رافیل کو کوئی گرا نہیں سکتا، ہم نے چار گرائے اور وہ بھی بھارت کی سرزمین پر تباہ کیئے ، ہمیں ہمارے سپہ سالار پر بہت فخر ہے ، اللہ نے ہمیں بہترین قیادت دی ہے ، ہم سپہ سالار کو خراج تحسین پیش کرتے ہیں ، حافظ صاحب نے جس طریقے سے اس ملک کی عوام کو عزت دلوائی ہے ، ہم دل کی گہرائیوں سے فیلڈ مارشل عاصم منیر کو مبارک دیتے ہیں اور شکریہ بھی ادا کرتے ہیں ۔آج ہم اپنے ایئر چیف کا بھی شکریہ ادا کرتے ہیں ، ہماری فضائیہ نے بڑی بہادری سے دشمن کو شکست دی، ان کے چھ جہاز گرائے ہیں، فضائیہ اور بحریہ کو بھی سلام پیش کرتے ہیں، میں آپ سب کی طرف سے پاک فوج کو کہنا چاہتاہوں کہ اس ملک کی طرف جب بھی دشمن میلی آنکھ سے دیکھے گا تو ملک کا ہر بچہ اپنی فوج کے ساتھ ملک کی حفاظت کرے گا ۔
انہوں نے کہا کہ آج میں ان شہداء کا ذکر کرنا چاہتاہوں ، وہ ہمارے بیٹے جنہوں نے اپنی جان قربان کرکے ہمارے بچوں کی حفاظت کی، جنہوں نے اپنی جان کی پرواہ نہیں کی، اپنی جان کا نذرانہ دیا ہے لیکن آپ کے بچوں پر آنچ نہیں آنے دی، اپنے ماں باپ کو بے سہارا چھوڑ دیا ، اپنے بچوں کو یتیم کر دیا لیکن قوم کے بچوں کو یتیم نہیں ہونے دیا۔ آپ سب کی طرف سے شہداء کو خراج تحسین پیش کرتے ہیں ، ہم آپ کے نذرانے کے مقروض ہیں، یہ قوم شہدا اور سپاہیوں کی مقروض رہے گی، آپ سب نے دیکھا جب بھارت نے حملہ کیا تو ایک معصوم چہرہ ، چھ سات سال کا بچہ جسے ٹارگٹ کیا گیا ، وہ شہید ہو گیا، اس کے والد نے اگلے دن ، جو فوجی ہیں ، نے کہا کہ میرا ایک بیٹا اللہ کی راہ میں چلا گیا اگر دوسرے بیٹے کی بھی ضرورت پڑے گی تو وہ بھی حاضر ہے ، جہاں یہ جذبہ ہو اس ملک کو کوئی شکست نہیں دے سکتا، مودی کی کیا اوقات ہے ۔
ان کا کہنا تھا کہ بھارت نے ترکیہ اور آذربائیجان پر پابندیاں لگا دی ہیں، ان کو بہت تکلیف پہنچی ہے ، وہ ترکیہ اور آذربائیجان جانے سے اپنے شہریو ں کو روک رہے ہیں ، ، یہ ملک ہمارے اصلی دوست ہیں، پاکستان کی تاریخ مین پہلی مرتبہ ہوا ہے کہ کسی کنونشن میں دوستوں کے جھنڈے لگائے گئے ہیں۔آج یہاں پر چین ، ترکیہ اور آذر بائیجان کا جھنڈا ہے ،پوری قوم کی طرف سے اپنے دوستوں کا شکریہ ادا کرتے ہیں ۔اس کے علاوہ وہ دوست جنہوں نے ہمارا ساتھ دیا، جنہوں نے سفارتی سطح پر ہمارا ساتھ دیا ان کا بھی شکریہ ادا کرتے ہیں۔
عبدالعلیم خان کا کہنا تھا کہ آج ہمارا کھویا ہوا مقام ڈیڑھ گھنٹے نے واپس لا کر دیا ہے ، پوری دنیا جان گئی ہے کہ پاکستان کی افواج کیا ہیں اور پاکستان کے عوام کیا ہیں ، جنہیں غلط فہمیاں تھیں سب دور ہو گئیں ہیں، جو بھارتی ڈرون ہم پر گرائے گئے وہ اسرائیل کے تھے ، اس کا مطلب ہے کہ آپ صرف اپنے ملک کی جنگ نہیں لڑ رہے بلکہ آپ پورے عالم اسلام کی جنگ لڑ رہے ہیں،اسرائیل کو بھی بہت تکلیف ہے ، سب دوستوں سے کہتاہوں کہ آج ہمارے پاس ایٹمی قوت اور بہادر افواج نہ ہو تو ہمارا حشر بھی غزہ میں لوگوں جیسا ہوتا ۔ مسلمانوں کے مخالف پاکستان کو ٹارگٹ کرنا چاہتے ہیں، اسرائیل نے نہ صرف اپنے ماہرین بھیجے بلکہ پاکستان پر حملہ کرنے کیلئے بھارت کو ڈرون بھی دیئے ، بھارت اسرائیل کی ساری ٹیکنالوجی استعمال کر رہا تھا۔ یہ فوج صرف پاکستان کی نہیں بلکہ عالم اسلام کی فوج ہے ، یہ سپہ سالار عاصم منیر صرف پاکستان کا نہیں بلکہ پورے عالم اسلام کا سپہ سالار ہے ۔
ان کا کہنا تھا کہ پاکستان کی حفاظت کیلئے یہ قوم متحد ہے ، کوئی بھی سیاسی جماعت ہو، سیاسی اختلاف ہو سکتاہے ، اس ملک کیلئے ہم سب اکھٹے ہیں ، جو پاکستان کا دشمن ہے ، اس کی اس ملک میں کوئی گنجائش نہیں ہے، وہ پاکستان میں نہیں رہ سکتا جو پاکستان کے خلاف کام کر رہا ہے ، جو پاکستان کی فوج کے خلاف ہے اس کا انجام وہ ہونا چاہیے جو مودی کا ہونا چاہیے ، پاکستان کا مخالف چاہے اندر ہو یا باہر اس کا انجام بھیانک ہونا چاہیے ۔
عبدالعلیم خان نے کہا کہ لیہ اور تونسہ کے درمیان پل بنا ہواہے دریا پر لیکن دونوں طرف سڑک ہی نہیں ہے ، اگلے کچھ دنوں میں لیہ تونسہ پل پرکام ہوتانظرآئےگا،لیہ تونسہ پل کا افتتاح رفاقت گیلانی کریں گے، ملتان میانوالی سڑک پر بھی کام ہوتا نظرآئےگا ملتان میانوالی سڑک کا افتتاح بھی رفاقت گیلانی کریں گے،چوہدری یاسرعرفات ساتھ ہوں گے، جنوبی پنجاب کےساتھ بہت زیادتی ہوئی،اس کی محرومیاں بہت زیادہ ہیں، پاکستان کے تمام صوبوں کیلئے پارٹی کے منشور میں شامل کر رہاہوں کہ ایک سے زیادہ اس کے حصے بننے چاہئیں ، ہمیں پنجاب کا نام بدلنے کی ضرورت نہیں، پنجاب کا نام بدلنا نہیں چاہتا، پنجاب پنجاب ہی رہے گا، ایک شمالی اور ایک جنوبی پنجاب ہوگا، اسی طرح سندھ میں بھی نام تبدیل نہیں کرنا ، انتظامیہ بہتر کر سکتے ہیں تو سندھ میں بھی شمالی اورجنوبی سندھ ہوناچاہیے، کےپی اوربلوچستان میں بھی شمالی اورجنوبی ہوناچاہیے،ہماری پارٹی اسی منشورکےساتھ آگے بڑھے گی، جنوبی پنجاب استحکام پاکستان پارٹی کا مطالبہ ہوگا، آپ کا صوبہ ہوگا تو عوام کو بہت سی نوکریاں ملیں گی، میرے پاس وزارت آگئی تومیڈیکل کالج بنادوں گا، کسی اور کے پاس وزارت ہو گی تو اس سے میڈیکل کالج بنانے کا کہوں گا، لیہ میں بہترین سڑکیں بناؤں گا، جس دن صوبہ بن گیا ڈویژن کی ضرورت نہیں رہے گی،لیہ خوبصورت علاقہ بنے گا۔
