ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ ہم نہ پہلے جھکے تھے نہ اب جھکیں گے ۔ ہمارے لیے شہادت کی آرزو زندگی سے زیادہ ہے۔ وطن کی خاطر قربان ہونا ہمارے لیے اعزاز ہے۔
چینی ٹی وی کو انٹرویو میں ڈی جی آئی ایس پی آر لیفٹیننٹ جنرل احمد شریف چوہدری نے کہا کہ پاکستان کیلئے سب اہم چیز اپنا عزم اور طاقت ہے، ہم اللہ کے بعد سب سے زیادہ انحصار اپنے آپ پر کرتے ہیں، جب ہمارا عزم مضبوط ہوگا تو بین الاقوامی کمیونٹی بھی کردار ادا کرتی ہے۔
ترجمان پاک فوج نے کہا کہ دنیا کے تمام ہی ممالک کو اس وقت بڑے چیلنجز کا سامنا ہے، بڑے ممالک کا ویژن بھی بڑا ہے،لوگ انسانیت کی ترقی کی جانب دیکھ رہے ہیں، دنیا کو موسمیاتی تبدیلی کے مسائل ہیں، بڑھتی آبادی کے مسائل سے نبرد آزما ہے، کیا ایسے میں ایک ملک دوسرے پر بلاجواز، جھوٹے بیانیے اور بغیر ثبوت کے چڑھ دوڑے؟ کیا ایک ملک پڑوسی ممالک پر اجارہ داری مسلط کرنے کی کوشش کرسکتا ہے۔
لیفٹیننٹ جنرل احمد شریف چوہدری نے کہا کہ پاکستان کی قوم پہلے کبھی جھکی تھی اور نہ اب ہم جھکیں گے، ہمارے شہادت کی آرزو زندگی سے زیادہ ہے، چاہے نیلی وردی والا ہو، سفید یا خاکی،شہادت ہمارے لئے ایک اعزاز ہے۔
ترجمان پاک فوج نے کہا کہ پاکستان اور چین دنیا میں 2 ذمہ دار ملک ہیں، پاکستان اور چین کی پہلی ترجیح لوگوں کی فلاح و بہبود ہے، لوگوں کی خوشحالی ہمیشہ امن و استحکام سے ہی آتی ہے، پاکستان اور چین خطے میں امن و استحکام کیلئے کوشاں ہیں۔
ان کا کہنا تھا کہ ہم دہشت گردی سے لڑرہے ہیں،دہشت گردی کا مقصد ہی ترقی روکنا ہے، چین نے انتہائی کم عرصے میں اتنی بڑی آبادی کے ساتھ ترقی کی،دنیا کو سیکھنا چاہئے، پاکستان کے عوام بھی چاہتے ہیں کہ ہم ترقی اور استحکام کی جانب جائیں، پہلی ترجیح امن،پاکستان کی گلیوں میں آپ کو امن کی خوشی مناتے لوگ نظر آئیں گے۔
ڈی جی آئی ایس پی آر نے کہا کہ ہم اللہ تعالیٰ کے حضور سجدہ شکر ادا کرتے ہیں کیونکہ ہم امن پسند ہیں، پاکستان کے لوگوں میں آپ کو انسانیت نظر آئے گی،عاجزی کے ساتھ اللہ کا شکر ادا کرتے ہیں، پاکستان کی آہنی دیوار میں عوام، مسلح افواج اور تمام شعبے شامل ہیں، پاکستان کی اس آہنی دیوار کو دہشتگردی کے ناسور کی جانب موڑنا ہے، اللہ نے چاہا تو ملک دوڑتا ہوا ترقی کی منازل طے کرے گا۔
