وفاقی وزیر خزانہ محمد اورنگزیب نے ویڈیو لنک کے ذریعے ایک اہم تقریب سے خطاب کرتے ہوئے پاکستان کے پہلے گرین سکوک بانڈ کے اجراء کا باقاعدہ اعلان کردیا۔ اس موقع پر انہوں نے پاکستان اسٹاک ایکسچینج کو اس تاریخی کامیابی پر مبارکباد دی اور اسے قابل فخر لمحہ قرار دیا۔
پاکستان نے جمعہ کو پی ایس ایکس میں اپنے پہلے ڈومیسٹک گرین سکوک بانڈ کا اجراء کردیا، جس کی مالیت 30 ارب روپے ہے۔
ویڈیو لنک کے ذریعے تقریب سے خطاب کرتے ہوئے وزیر خزانہ محمد اورنگزیب نے بتایا کہ پاکستان کا مقامی قرضہ 37 کھرب روپے ہے، جس میں سے 5 کھرب روپے تقریباً 14 فیصد سکوک پر مشتمل ہے۔
انہوں نے کہا کہ یہ سکوک پاکستان کی معیشت اور کیپیٹل مارکیٹ پر سرمایہ کاروں کے بڑھتے ہوئے اعتماد کا مظہر ہے، اجارہ اسٹرکچر پر مبنی تین سالہ یہ سکوک متغیر شرح پر جاری کیا جارہا ہے اور یہ سسٹین ایبل انویسٹمنٹ سکوک فریم ورک کے تحت جاری ہوگا۔
محمد اورنگزیب کا کہنا ہے کہ پاکستان اسٹاک ایکسچینج اور پاکستان کیلئے بہترین وقت ابھی آنا باقی ہے، انہوں نے حالیہ لندن دورے میں عالمی سرمایہ کاروں سے ملاقات کے بعد اس رجحان کو امید افزاء قرار دیا۔
وزیر خزانہ نے مزید کہا کہ عالمی سرمایہ کار پاکستان میں دلچسپی رکھتے ہیں بشرطیکہ ملک معاشی استحکام برقرار رکھے اور توانائی، ٹیکس اور سرکاری اداروں میں اصلاحات جاری رکھے۔
انہوں نے بتایا کہ حکومت اسٹیک ہولڈرز کے ساتھ مشاورت کر رہی ہے تاکہ مالی سال 26-2025ء کیلئے ایک حوصلہ افزاء بجٹ پیش کیا جاسکے۔
