چیئرمین پبلک اکاؤنٹس کمیٹی جنید اکبر نے اپنا استعفیٰ پارٹی کو جمع کرادیا۔
پارلیمنٹ ہاؤس کے باہر سماء سے بات کر تے ہوئے جنید اکبر نے تصدیق کی اور بتایا کہ انھیں ابھی تک باضابطہ طریقے سے استعفیٰ دینے کو نہیں کہا گیا تاہم بیرسٹر گوہر سے کہا ہے کہ بانی پی ٹی آئی سے تصدیق کرلیں۔ چاہتا ہوں کہ ایسا تاثر نہ جائے کہ عہدے میرے لئے اہم ہے۔
دوسری جانب ترجمان قومی اسمبلی سیکرٹریٹ کا کہنا ہے کہ ابھی تک چیئرمین پی اے سی جنید اکبر کا استعفیٰ موصول نہیں ہوا۔ استعفیٰ دینے اور اس کی منظوری کا باقاعدہ طریقہ کار ہے۔ جیسے ہی اس حوالے سے کوئی پیش رفت ہوئی اسپیکرکو آگاہ کیا جائے گا۔
واضح رہے کہ پاکستان تحریکِ انصاف کے بانی چیئرمین عمران خان نے پارٹی رہنما جنید اکبر کو پبلک اکاؤنٹس کمیٹی کی چیئرمین شپ چھوڑنے کی ہدایت کی ہے۔
ذرائع کے مطابق یہ پیغام علیمہ خان کے ذریعے پارٹی قیادت تک پہنچایا گیا۔ بانی پی ٹی آئی نے جنید اکبر کو پارٹی عہدوں پر مکمل توجہ دینے کی ہدایت کی ہے، جب کہ ان کی جگہ عمر ایوب کو پی اے سی کا نیا چیئرمین نامزد کرنے کا امکان ظاہر کیا جا رہا ہے۔
