وفاقی وزیر مواصلات عبدالعلیم خان کا کہنا ہے کہ پاک افواج کی محنت رنگ لائی اور اللہ تعالیٰ نے پاکستان کو کامیابی عطا کی۔ بین الاقوامی سطح پر ذمہ دارانہ کردار ادا کرتے ہوئے خطے میں تعاون کو فروغ دینا ہوگا۔
اسلام آباد میں وفاقی وزیر مواصلات عبدالعلیم خان سے ترکیہ کے سفیر ڈاکٹر عرفان نیزیراولو نے ملاقات کی اور پاکستان کی حالیہ کامیابی پر مبارکباد پیش کی۔ انہوں نے بھارتی جارحیت کے خلاف پاکستان کے دلیرانہ اور ذمہ دارانہ ردعمل کو سراہا۔
وفاقی وزیر نے ترکیہ کی جانب سے پاکستان کی حمایت پر شکریہ ادا کیا اور دونوں ملکوں کے درمیان پائیدار تعلقات پر اطمینان کا اظہار کیا۔ ملاقات میں آئندہ ’’کاذان فورم‘‘ کے انعقاد پر بھی تبادلہ خیال ہوا۔
عبدالعلیم خان نے کہا کہ پاکستان خطے میں بین الاقوامی تعاون کے فروغ کا خواہاں ہے اور کاذان فورم میں دیگر ممالک کو تجارتی راہداریوں میں شمولیت کی دعوت دی جائے گی۔
ترکیہ کے سفیر نے پاکستان کی دفاعی حکمت عملی کی تعریف کرتے ہوئے کہا کہ ترکیہ اور پاکستان کی دوستی بے مثال ہے۔ دونوں ملکوں کے عوام ایک دوسرے کے لیے خیرسگالی کے جذبات رکھتے ہیں۔ سفیر ترکیہ نے یقین دہانی کرائی کہ ان کا ملک آئندہ بھی مشکل وقت میں پاکستان کا بھرپور ساتھ دے گا۔
