ترکیہ کے صدر رجب طیب اردوان نے وزیراعظم محمد شہباز شریف کو ٹیلی فون کیا اور بھارتی جارحیت کے نتیجے میں پاکستانی شہریوں کی شہادت پر گہری تعزیت کا اظہار کیا جبکہ جنوبی ایشیا میں امن کے لیے پاکستان کے عزم کی تعریف کرتے ہوئے ترکیہ کی جانب سے مکمل یکجہتی کا اعادہ کیا۔
وزیراعظم شہباز شریف نے بھارتی جارحیت کے بعد ترکیہ کی یکجہتی اور حمایت کو سراہا اور ترک صدر کو بتایا کہ بھارتی مذموم میزائل حملوں میں بچوں اور خواتین سمیت کم از کم 26 افراد شہید ہوئے۔
وزیر اعظم نے کہا کہ بزدلانہ بھارتی حملے نے جنوبی ایشیا میں امن و استحکام کو شدید خطرے میں ڈال دیا ہے۔
شہباز شریف نے زور دیا کہ پاکستان کے لیے اپنی خودمختاری اور علاقائی سالمیت پر یہ حملہ ناقابل قبول ہے۔
وزیراعظم نے بتایا کہ بھارت نے غیر جانبدار اور شفاف بین الاقوامی تحقیقات کی پیشکش کا جواب نہیں دیا۔
انہوں نے بغیر ثبوت پہلگام واقعے میں پاکستان کو ملوث کرنے کے بھارتی ہتھکنڈوں کو مسترد کرتے ہوئے کہا کہ پاکستان اپنی خودمختاری اور علاقائی سالمیت کا پوری قوت اور طاقت کے ساتھ دفاع کرے گا۔
صدر رجب طیب اردوان نے کہا کہ پاکستان کے دیرینہ دوست کے طور پر ترکیہ اپنا کردار ادا کرنے کو تیار ہے۔
انہوں نے کہا کہ ترک قوم پاکستان کے سفارتی اقدامات کی کامیابی کے لیے دعاگو ہے۔
صدر اردوان کے مطابق ترک وزیر خارجہ نے اپنے پاکستانی ہم منصب سے رابطہ کرکے کہا کہ ترکیہ موجودہ صورتحال میں کشیدگی کم کرنے کی حمایت کرتا ہے۔
