محکمہ موسمیات نے خبردار کیا ہے کہ مغربی ہواؤں کا نیا سلسلہ 7 مئی سے پاکستان کے بالائی اور وسطی علاقوں کو متاثر کرے گا، جبکہ نم آلود ہوائیں وسطی و جنوبی علاقوں میں بھی داخل ہوں گی، جس کے نتیجے میں ملک بھر میں آندھی، گرج چمک، بارش اور بعض مقامات پر ژالہ باری کا امکان ہے۔
محکمہ موسمیات کے مطابق کشمیر میں نیلم، مظفرآباد، راولاکوٹ، پونچھ، باغ، کوٹلی، بھمبر اور میرپور سمیت متعدد علاقوں میں 7 سے 12 مئی تک وقفے وقفے سے موسلادھار بارش اور ژالہ باری ہو سکتی ہے۔ گلگت بلتستان میں دیامر، استور، سکردو، گلگت، ہنزہ اور گردونواح میں 8 سے 12 مئی تک بارشوں کا امکان ہے۔
پنجاب اور اسلام آباد میں 7 سے 11 مئی تک لاہور، راولپنڈی، گوجرانوالہ، فیصل آباد، ساہیوال، ملتان، ڈی جی خان، بہاولپور سمیت کئی اضلاع میں آندھی، گرج چمک، اور ژالہ باری ہو سکتی ہے۔
خیبر پختونخوا میں چترال، سوات، ایبٹ آباد، پشاور، مردان، کوہاٹ، بنوں، ڈی آئی خان سمیت دیگر اضلاع میں 7 سے 12 مئی تک شدید موسمی صورتحال متوقع ہے۔ بلوچستان میں کوئٹہ، ژوب، سبی، خضدار، موسیٰ خیل، آواران وغیرہ میں 7 سے 10 مئی کے دوران بارش کا امکان ہے۔
سندھ کے سکھر، لاڑکانہ، میرپور خاص، تھرپارکر، عمر کوٹ، سانگھڑ و دیگر اضلاع میں 8 سے 10 مئی کے دوران بارش اور آندھی کی پیش گوئی کی گئی ہے۔
محکمہ موسمیات نے خبردار کیا ہے کہ آندھی، ژالہ باری اور بجلی گرنے سے کمزور ڈھانچوں، بجلی کے کھمبوں، درختوں اور گاڑیوں کو نقصان پہنچ سکتا ہے۔ کسانوں کو گندم کی کٹائی سمیت دیگر زرعی سرگرمیوں میں احتیاط برتنے کا مشورہ دیا گیا ہے۔
