لگژری گاڑیوں کے شوقین افراد کیلئے خوشخبری سامنے آئی ہے، معروف کار ساز کمپنی کِیا نے اپنی گاڑی اسپورٹیج کی قیمت میں ساڑھے 18 لاکھ روپے کی غیر معمولی کمی کردی ہے۔
کیا موٹرز کمپنی نے جمعرات کے روز پاکستان میں اپنی کمپیکٹ ایس یو وی اسپورٹیج ایل لائن اپ کی قیمتوں میں 18 لاکھ 51 ہزار روپے تک کی کمی کردی ہے جس کا باقاعدہ نوٹیفکیشن بھی جاری کردیا گیا ہے۔
کیا موٹرز کے اعلامیے کے مطابق نئی قیمتوں کا اطلاق یکم مئی 2025ء سے ہوگا۔
اسپورٹیج ایل ایچ ای وی کی قیمت ایک کروڑ 28 لاکھ 50 ہزار روپے سے کم ہوکر ایک کروڑ 9 لاکھ 99 ہزار روپے ہوگئی، یعنی اس میں 18 لاکھ 51 ہزار روپے کی رعایت دی گئی ہے۔
اسی طرح اسپورٹیج ایل ایف ڈبلیو ڈی کی قیمت اب 99 لاکھ 99 ہزار روپے ہے، جو پہلے ایک کروڑ 18 لاکھ 25 ہزار روپے تھی، اس میں 18 لاکھ 26 ہزار روپے کی کمی کی گئی ہے۔
بنیادی ویریئنٹ، اسپورٹیج ایل الفا اب 84 لاکھ 99 ہزار روپے میں دستیاب ہوگی جبکہ اس کی پرانی قیمت 94 لاکھ 99 ہزار روپے تھی۔
آٹومیکر کا کہنا ہے کہ یہ اقدام کیا موٹرز کی جانب سے شاندار ڈیزائن، پرفارمنس، ٹیکنالوجی اور سیفٹی کے ساتھ پریمیم گاڑیاں فراہم کرنے کے عزم کی تصدیق کرتا ہے۔
