وزیر اعظم شہباز شریف نے سابق وزیر اعظم اور مسلم لیگ ( ن ) کے قائد نواز شریف سے ملاقات کی ہے۔
اتوار کے روز جاتی امرا میں وزیراعظم شہباز شریف نے نواز شریف سے ملاقات کی اور پہلگام واقعے کے بعد قومی سلامتی کمیٹی کے اجلاس میں کیے گئے فیصلوں سے آگاہ کیا۔
ملاقات میں وزیراعلیٰ پنجاب مریم نواز بھی شریک تھیں۔
نواز شریف نے کہا کہ پاکستان خطے میں امن کا خواہاں ہے اور ہر قسم کی دہشت گردی کی شدید مذمت کرتا ہے۔
وزیراعظم شہباز شریف نے پہلگام واقعے کو بھارت کا ’’پری پلان ڈرامہ‘‘ قرار دیتے ہوئے کہا کہ بھارت ماضی میں بھی اس طرح کے ڈرامے رچا چکا ہے۔
انہوں نے کہا کہ سندھ طاس معاہدہ معطل کرنے جیسے فیصلے جنگی حالات میں بھی نہیں کیے گئے لیکن اگر بھارت نے جارحیت کی تو اینٹ کا جواب پتھر سے دیں گے۔
شہباز شریف نے نواز شریف کو بھارت کی اشتعال انگیز کارروائیوں اور اس کے جواب میں پاکستان کے مؤقف سے آگاہ کیا اور انہوں نے کہا کہ ملک کا مستقبل روشن ہے اور پاکستان جاگ رہا ہے۔
