پاکستان سوزوکی موٹر کمپنی نے اپنی عوامی گاڑی سوئفٹ جی ایل ایم ٹی کی قیمت میں 80 ہزار روپے کے بڑے اضافے کا اعلان کردیا۔
رپورٹ کے مطابق پاک سوزوکی موٹر کمپنی کی جانب سے سوئف کی قیمت 80 ہزار روپے کے اضافے کے بعد 43 لاکھ 36 ہزار روپے سے بڑھ کر 44 لاکھ 16 ہزار روپے ہوگئی ہے۔ نئی قیمت 26 اپریل 2025ء سے نافذ العمل ہے۔
سوزوکی سوئفٹ جی ایل ایم ٹی پاکستان میں سوزوکی کی مقبول ہیچ بیک گاڑیوں میں سے ایک ہے، تاہم قیمت میں حالیہ اضافے کا اثر اس کی مارکیٹ میں مسابقت پر پڑسکتا ہے خصوصاً ایسی صورتحال میں جب پہلے ہی پاکستان میں گاڑیوں کی قیمتوں میں اضافہ اور معاشی چیلنجز کی وجہ سے خریداروں کی تعداد میں کمی آرہی ہے۔
سوزوکی موٹر کمپنی پاکستان نے اس سے قبل فروری 2025ء میں اپنی سب سے چھوٹی گاڑی سوزوکی آلٹو کی قیمت میں ایک لاکھ 20 ہزار روپے تک اضافہ کیا تھا۔
اس وقت کمپنی نے وضاحت کی تھی کہ یہ تبدیلی نئی خصوصیات کے متعارف ہونے کی وجہ سے ہے تاکہ ڈرائیونگ کے تجربے کو بہتر اور حفاظتی معیارات کو یقینی بنایا جاسکے۔
قیمت میں تبدیلی کے بعد سوزوکی نے باقاعدہ طور پر آلٹو کا اپ گریڈ ورژن متعارف کرایا ہے جس کے بعد توقع کی جارہی ہے کہ سوئفٹ میں بھی بڑی تبدیلیاں کی جائیں گی۔
